Mga Sekreto ug Mga Sorpresa
Ang tagsulat nagpuyo sa Iowa, USA
Eksakto ba nga itago ang sekreto ni Kate?
“Ang Espiritu ni Kristo gihatag ngadto sa matag tawo, nga siya masayud sa maayo gikan sa dautan” (Moroni 7:16).
“Uy, tan-awa!” Gipunit ni Kate ang usa ka kinumot nga papel nga monyeka gikan sa salog sa tindahan. “Nia, isulod ni sa imong bulsa.”
“Gusto ka nga dad-on ko kini?” Nangutana si Maddy.
“Ang tindahan dili na makabaligya niini bisan unsaon,” miingon si Kate. “Ila lamang kining ilabay sa basurahan. Kini usa ka pagluwas nga misyon. Nagluwas kita niini nga monyeka!”
Mipahiyom si Kate ni Maddy. Mibalos si Maddy sa pagpahiyom.
“OK.” Gisulod ni Maddy ang monyeka nga papel ngadto sa iyang bulsa. Gibati ko nga espesyal nga nauban sa usa ka misyon sa pagluwas!
Sa gihapon, samtang sila migawas sa tindahan, ang monyeka nga papel ingon og usa ka bug-at nga dakong bato diha sa iyang bulsa. Mao ba kana unsay bation sa usa ka misyon sa pagluwas?
Sa dihang miabut na sila sa balay ni Maddy, mabinantayon nga gipapilit og gihapyod ni Kate ang papel nga monyeka kutob sa iyang mahimo.
“Unsa nga matang sa sinina ang kinahanglan nako nga himoon kaniya?” nangutana siya, nagpunit og usa ka krayola. “Unsa kaha kon usa ka nindot nga taas nga sinina alang sa mga party?”
Si Maddy mahinamon nga miyango. “Dayon atong ikapakita sa akong mama!”
“Ayaw! Kita dili makahimo sa pagsulti ni bisan kinsa,” miingon si Kate. “Dili gayud. Kini mao ang atong sekreto, OK? Saari ako nga ikaw dili mosulti.”
“Ah … OK. Mosaad ko,” miingon si Maddy. “Apan nganong dili kita makasulti?”
“Kon ikaw mosulti, ang imong mama masuko, ug tingali siya dili na mosugot nga kita magdula pa.”
“Nganong masuko man siya?” Nangutana si Maddy. Ang iyang tiyan murag nangurog ug nakuyawan.
Gibutang ni Kate ang iyang krayola. “Kon dili ka mosulti, ikaw ang maggunit sa monyeka ug sa tanang mga sinina nga akong drowingon alang kaniya.”
Karon si Maddy nahibalo nganong gibati niya ang tumang kakuyaw. “Atong … atong gikawat ni, di ba?” mihagawhaw siya.
“Hoy, ikaw ang misulod niini sa imong bulsa ug mipalusot niini gawas sa tindahan.”
“Tungod kay imo akong gisultihan!”
“Wala ako misulti!” Miingon si Kate. “Mopauli na ko sa dili pa nimo ako apilon sa gubot.” Mibarug siya ug midagan pagawas sa pultahan.
Mao gyud ang pagsulod ni Mama sa kwarto. “Nganong ingon ka dinalian ang pagbiya ni Kate?” Nakita niya ang monyeka nga papel sa mga kamot ni Maddy. “Ug diin kana gikan?”
Gipaak ni Maddy ang iyang ngabil. Wala siya mobati og kamaayo mahitungod sa pagtipig og sekreto gikan ni Mama. Apan unsa kaha kon si Kate husto ug si Mama masuko?
Ang gibati nga kakulba diha sa iyang tiyan wala mawala. Siya miginhawa og lawom ug gisulti ang tibuok istorya.
“Gipasaad ko ni Kate sa pagtago niini nga sekreto,” miingon siya. “Apan kini sayop.”
Si Mama milingkod tupad niya diha sa katre. “Ang kadaghanan sa mga sekreto mga sayop. Ilabi na kon ikaw gisultihan nga dili gayud mosulti ni bisan kinsa. Sa laing bahin, ang usa ka sorpresa, sama sa usa ka gasa o party, mahimong usa ka maayo nga butang. Nagpasabut kini nga makalingaw alang sa tanan.”
Mitando si Maddy. “Salamat sa wala pagkasuko kanako,” miingon siya. “Miingon si Kate nga ikaw masuko.”
Gigakos siya pag-ayo ni Mama. “Ako mapasigarbuhon kaayo kanimo sa pagpaminaw sa Espiritu Santo ug sa pagsulti kanako sa tinuod.”
“Mahimo bang ihatud mo ako og balik sa tindahan aron iuli ang monyeka?” Nangutana si Maddy.
“Mao gyud!” Mipahiyom si Mama. “Ug kon kita mopauli, makatabang ka kanako sa paghimo og usa ka cake nga isorpresa ni Papa.”
Si Maddy mikatawa. “Karon mao kana ang usa ka butang nga ako mobati og kamaayo!”
Mga paghulagway ni Devin McSherry