O se Malaga ua Tolopoina
E alala le tusitala i Maine, ISA.
Ae faapefea pe afai e le asiasi atu Freddie i ona matua matutua i Korea?
“E Mafai Ona Faavavau Aiga,” (Tusipese a Tamaiti, 98).
Sa fusi e Freddie ia tama tofa. “Tau atu ia Haraboji o loo matou tatalo mo ia.”
“Ia ua lelei. O le a ou valaau mai i aso uma e tau atu ia te oe pe o a mai o ia.”
Sa luelue le ulu o Freddie ma folo le patu i lona faai.
Sa malaga ese Tama mo Korea i Saute e asiasi i matua o matua o Freddie, Haraboji ma Halmoni. E toeitiiti lava atoa se masina o le a alu ai o ia ae nofo Freddie ma lona aiga i le fale i le Iunaite Setete.
Sa tapuni le faitotoa, ma sa alu Tama.
“Maimau pe ana mafai foi ona ou alu,” o le memumemu a Freddie. Sa Ia solo ese se loimata. E lei toe vaai lava Freddie ia Haraboji ma Halmoni i se taimi umi lava. Sa teuina e lona aiga se tupe e faaalu ai le isi a latou tafaoga ma i latou i Korea i Saute. Ae sa ma’i Haraboji, ma o lea ua ia manaomia nei se taotoga.
“Ou te faamalie atu, Freddie” o le tala lea a Tina. “Maimau pe ana mafai ona tatou o uma ma tama, ae e lei lava ni a tatou tupe ua teuina. Ma e taua le alu o lou Tama i le taimi nei, ona e manaomia o ia e Haraboji.”
“Ae a pe a le mafai e fomai ona fesoasoani ia Haraboji? Ae faapefea pe a maliu o ia ma ou te le vaai lava ia te ia? Ua tatau ona tatou o faatasi ma Tama i le taimi nei!” Sa ia soloiesea isi loimata. Sa ia lagona le faanoanoa ma le ita.
Na opo faataamilo lima o Tina ia te ia. Ina ua taofi lana tagi, sa ia fesili mai, “E tatau ona ta faia se isi tatalo mo Haraboji?”
Sa luelue le ulu o Freddie, ma piilima o laua lima ma tatalo faatasi.
Sa tatalo Freddie ma lona aiga mo Haraboji i aso uma. Sa faamautinoa e Freddie e faamanatu pea ia i latou. Sa ia taumafai i le mea sili na te mafaia e fesoasoani ai a o toesea Tama. Sa ia faia ni galuega a Tama, e pei o le faasavali o le taifau ma faitau tala i tamaiti laiti a o lei momoe.
Na mavae atu vaiaso, ma sa le i toe faanoanoa Freddie. Ae sa popole lava o ia mo Haraboji.
I se tasi po sa ia talanoa i luga o le telefoni ia tama. “Ae faapefea pe afai ou te le alu lava i Korea?” na ia fesili ai. “Ae faapefea pe afai e le toe manuia Haraboji, ma ou misia lou avanoa e vaai ai ia te ia?”
“Freddie, e i ai se aso o le a e maua ai se avanoa e asiasi ai i Korea. Ae tusa pe ola Haraboji pe leai, o le a e toe vaai ia te ia. O le tatou aiga e faavavau.”
“Ou te iloa”. sa fai mai ai Freddie. Sa lagona e Freddie se mea mafanafana i lona fatafata. O le a ia toe vaai ia Haraboji i se aso, e tusa lava po o le a le mea na tupu.
“Ou te alofa ia te oe, Freddie,” o le tala lea a Tama. “Ma o le a lata mai lou toe foi atu i le fale.”
“Ou te alofa foi ia te oe.”
Sa ataata Freddie a o ia tuu i lalo le telefoni. Sa ia silafia o le a latou faatasi uma i se aso. Sa fiafia o ia ona sa i ai sona aiga e faavavau.
Sa manuia Haraboji! Ma i le lua tausaga mulimuli ane, sa asiasi atu Freddie ia te ia i Korea i Saute!
Ata na tusia e Karly Jade Catto