O Le Fesili o le Faamaoni

Saunia e Juliann Tenney Doman

(E faavae i se tala moni)

E alala le tusitala i Iuta, ISA.

O le a le mea e sili atu ona taua: o se faailoga po o le upumoni?

“Fai le mea lena e faamaoni” (2 Korinito 13:7)

“Christy, o le mea lea mo oe,” o le tala lea a lona faiaoga, o Mrs. Devin. Sa ia tuuina atu se teutusi ia Christy.

“Faafetai,” o le tala lea a Christy. Sa ia sasae ma tatala le tuatusi ma faitau le tusi o loo i totonu.

Faamalo atu! O oe o se tasi o tamaiti aoga e toaono na filifilia e au uo ina ia maua se faailoga o se Tagatanuu Maoae mo le vasega lima. Faamolemole tali fesili o i lalo ma auina atu i le ofisa i le faaiuga o le aso mo o tatou faamasino e iloilo ai.

Sa oomi fiafia e Christy le teutusi. Sa tau le mafai ona faatali o ia e faaali atu i ana uo!

“E te mateina!” na ia tau atu ai ia Gabriella i le taimi o le malologa. “Atonu o le a ou maua se faailoga.”

“Matuai manaia tele!” o le tala lea a Grace.

“E tatau lava ona ou taliina muamua nei fesili,” o le tala lea a Christy. “Ae ou te lagona e pei ua ou le maua ni mea mananaia, e tusi e uiga i ai. O le tasi e faapea mai, ‘Na faapefea ona e faia se eseesega i lou alalafaga?’ Ua faigata ia te au le mafaufau i soo se mea.”

“Atonu e mafai ona e tusia se mea e te manatu e lelei ona fai,” o le tala lea a Gabriella. “E le o se mea tele lava,” o lana tali lea. Na o lo latou fia iloa lava po o le a le ituaiga tagata o loo i ai oe.”

Sa lei maua se lagona fiafia o Christy i le fatuina o se mea e le moni. Ae atonu e mafai ona ia tusia se mea e mafai ona ia fuafua e fai i le lumanai. Sa ia tataina lana penitala i luga o le itulau a o ia mafaufau.

Ona ia manatua lea o se faamatalaga sa ia matauina i le faletusi lautele: “Sailia ni faiaoga mo faitauga amata.” Sa fiafia o ia e fesoasoani i ona tei laiti e faitau. E mafai foi ona malie le fesoasoani i isi tamaiti. E lei saini o ia e fesoasoani … ae sa manao i ai o ia! Sa ia tusia i lalo, “o le volenitia i le faletusi e fesoasoani i tamaiti e aoao e faitau.”

Sa tilotilo Christy i le mea na ia tusia. Sa ia faalogoina sina patu laitiiti i lona faai ma taumafai e folo i lalo. Ae o le lagona le lagolelei na foliga mai na pei ua sili atu ona leaga a o savali atu i le ofisa e tuuina atu ana tali.

A o savali atu Christy i le fale mai le aoga, sa lagona le mamafa o ona tulagavae. E oo atu i le taimi o le aiga o le afiafi ua le lagona sona fia ai.

“O LELEI oe, lau pele?” o le fesili lea a tina.

Sa mapuea leotele Christy. “E leai.”

“E te fia talanoa e uiga iai?” o le fesili lea a Tama.

Na faamatala e Christy le mea na ia faia. “Ou te lei maua se lagona lelei i [lo’u] loto talu mai lena taimi.” Sa piilima ona lima ma faasee i lalo i lona nofoa.

“Ua ou fiafia na e ta’uina mai ia maua. Na oomi e Tina le lima o Christy. “O le laasaga muamua lena i le faasa’oina o se mea.”

“Ma ou te iloa le isi laasaga e sosoo ai,” o le tala lea a Christy ma ataata. Na o le mafaufau lava i mea na te faia na ia maua ai ni lagona lelei tele isi atu.

I lena po a o tatalo o ia, sa ia ta’u atu i le Tama Faalelagi ua faanoanoa o ia ona sa lei faamaoni o ia. Sa ia iloa o le a Ia fesoasoani ia te ia ia salamo ma ia faasa’o mea uma.

O le taeao na sosoo ai, sa savali atu Christy i le ofisa a le aoga. Sa ia tatala masau le faitotoa ma laa atu i totonu …