Tusia e Oe

Sau, Mulimuli Mai ia te A’u i le taimi o KOVITI

Sara F., 10 tausaga, Pas-de-Calais, Farani

I le taimi o le faasu puipui o le KOVITI-19, sa ou aoga i le fale ma Papa. Sa faia au meaaoga masani, ae sa ma suesue foi i le tusi lesona o le Sau, Mulimuli Mai ia te A’u a le Peraimeri. O nisi nei o mea sa ou faia:

Sa ou faia se pale ou te ofuina i le fale pe a ou fesoasoani i ou matua. Ou te fia auauna atu e pei o le Tupu o Peniamina.
Sa ou valiina se pine e mamanuina i le fatu. Ua faamanatu mai ai ia te au ina ua papatisoina a’u, sa ou tauaveina le suafa o Keriso i o’u luga.
Sa ou tusia se ata o Iosefa Samita ma valivali. O se faamanatu ia te au o Iosefa Samita o se perofeta a le Atua.
Sa ou faia se gaoioiga e taoti-ai-pepa e uiga i le Perofeta o Apinati i le Tusi a Mamona. Sa ou mafaufau e tatau foi ona ou tu atu mo le mea moni.
Sa ou valiina se ata o le papatisoga o Iesu Keriso. E faamanatu mai ai ia te a’u ina ua ou papatiso, sa ou osia se feagaiga ma lo’u Tama Faalelagi.

Ona sa ou suesue i le Sau, Mulimuli Mai ia te A’u, Ou te manatu sa fesoasoani mai le Tama Faalelagi ia te au i le aoga. I le taimi muamua sa tele mea sese i a’u meaaoga. Ona fai mai lea o lou Tama ia te au ia amatalia i le faia o se tatalo. Ina ua uma le tatalo, sa lelei atu lo’u malamalama. E lei umi ae ou le toe faia ni mea sese se tele. Ina ua maua e o’u faiaoga a’u meaaoga, sa latou fai mai, “Malo, Sara! Fai pea le mea o loo e faia!”

Sa faamae’aina ma le manuia la’u tausaga aoga. Ma sa lelei le aoga i le aiga, aua sa ma amata i taimi uma i se tatalo, e pei foi ona matou faia pe a matou suesue i le Sau, Mulimuli Mai ia te A’u.