O Paionia i Laueleele Uma
Vaha‘i Toga
Faataitaiga i Toga
E alala tusitala i Uaikato, Niu Sila, ma Iuta, ISA.
Sa faaauau pea le tatalo a Vaha‘i, ma i se tasi aso sa ese ai.
Sa tootuli ifo Vaha‘i i autafa o lona moega e fai ana tatalo. O lona po muamua lea sa i ai i le aoga nofotumau, ma sa nofo faatasi o ia ma isi tama e toatele i se potu. Sa leai se tasi o i latou o se tagata O Le Ekalesia a Iesu Keriso o le Au Paia o Aso e Gata Ai, e pei o ia.
“Le Tama Faalelagi pele …” Sa amata ona tatalo Vaha‘i i lona loto. Ae sa lei faigofie. O isi tamaiti sa tautatala ma talie leotele.
“E, vaai!” o se tasi o ana uo sa latou potu faatasi, o Akau, sa ee mai. “O loo ia tatalo.”
Sa fesiitai solo Vaha‘i ma le le mautonu. Sa ia iloa na ula Akau ia te ia. Ae sa ia faafoliga mai na te le’o lagonaina o ia. Sa na o lona tatalo pea.
Ina ua faatoa iloa e Vaha‘i le talalelei, sa lei fiafia foi ona matua matutua i le Ekalesia. Ua alu Vaha‘i i le Peraimeri ma le uso o lona tama po o ana uo.
O le taimi lava na atoa ai lona 12, sa ia filifili loa e papatiso. Sa lei fiafia tele ona matua matutua i le taimi muamua. Ae na fai mai foi lona tinamatua, “Mai le taimi lenei, o oe o se tagata o lena Ekalesia. Matou te mananao ia tausisia lou faatuatua.”
O lea la ua alu Vaha‘i i le aoga, sa naunau o ia e fai le mea tonu lava lena. O lea sa ia tatalo ai pea. E tusa lava pe na ula isi tamaiti ia te ia.
I se tasi po a o tootuli i lalo Vaha‘i, sa ia faalogo i se isi mea e ese ai.
“Ei, ia filemu! Ua tatalo Vaha‘i, “o le tala lea a se tasi.
Sa faauma e Vaha‘i lana tatalo ma pupula ona mata.
Sa nofo Akau i luga o lona moega. “E taua tele ia te oe, a ea?”
Sa luelue le ulu o Vaha‘i . “Ioe, o lena.”
Ina ua mavae lena, sa fifilemu isi tama i soo se taimi e tatalo ai Vaha‘i. E lei umi ae amata ona tootutuli ifo Akau ma ia. Sa auai foi isi tama. Na iu lava, ina tootutuli uma tama i le potu e tatalo ma Vaha‘i i po taitasi.
Sa lagona e Vaha‘i le fiafia. Na te lei faia lava ni tatalo faaleaiga i le fale. Ae o lea la ua mafai nei ona faia tatalo faaleaiga ma ana uo aoga!
I se tasi aso na maua ai e Vaha‘i se manatu. Sa agai i luma se sauniga tele a le Ekalesia. E mafai ona ia valaaulia ana uo!
Ina ua uma le tatalo, sa tau atu e Vaha‘i i tagata uma e uiga i le sauniga. “Ua taua o le konafesi faaleitu,” o lana tala lea. “Ua o mai tagata e aoao e uiga ia Iesu. E mafai ona outou o mai uma, pe a outou mananao ai.”
Talu ai ona o le a la tuua le aoga e o i le fonotaga, sa tatau ai i tamaiti taitoatasi ona sainia se pepa e aumai ai se faatagaga. Sa ofo Vaha‘i ina ua ia vaai i le pepa. Sa 77 igoa i le lisi!
Sa lagona e Vaha‘i’ le loto mafanafanaa a o nofo o ia ma laina o ana uo aoga ma faalogologo i lauga i le konafesi. Atonu sa i ai ni lagona mafana o Akau ma isi i totonu foi. E oo atu i le faaiuga o le konafesi, e toafitu i latou na mananao e papatiso!
I lena po ina ua uma le tatalo ma ana uo, na faia e Vaha‘i se tatalo mo ia lava. “Faafetai lava mo le faamanuiaina o au i ni uo lelei,” sa ia fai atu ai i le Tama Faalelagi. “Ma mo le fesoasoani ia te au ia avea ma se faataitaiga lelei.”
O Toga e fausia i motu e 170 i le Vasa Pasefika.
O le aso, e toaono mai tagata e toasefulu i Toga o ni tagata o le Ekalesia.
O Toga ua taua foi o le “Motu Faauogofie.”
O Vaha‘i ma lona faletua, o Sela, sa avea ma uluai ulugalii na faamauina i le malumalu o Hamilton Niu Sila.
Sa avea o ia ma Peresitene o le malumalu o Nukualofa Toga.
Sa faiaoga o ia i le kolisi o le Liahona, o se aoga maualuga e pulea e le Ekalesia i Toga.
Ata na tusia e Susan Keeter