Fua fou a Winfred
O lenei tala sa tupu i Kampala, Uganda
“Sa tatou ola e tusa ma le ala o le fiafia” (2 Nifae 5:27).
O le a se mea e mafai ona tuu e Winfred i lana fua?
Sa fesoasoani Winfred ia Jajja (tinamatua) e fai le meaai o le afiafi.
“Mmm, Ou te fiafia i le matoke,” le tala lea a Jajja.
“E faapena foi a’u,” o le tala lea a Winfred. “O se tasi lea o meaai ou te fiafia tele iai! Ou te fiafia i fai lanumeamata. Ma pepa feu ma tamato. Ae o le vaega sili ona lelei o le sosi.”
“O le mea lena ona e tuufaatasia uma e le sosi ia tofo eseese i le tasi,” o le tala lea a Jajja.
Sa laua tipitipi pea fualaau faisua. Ona mapuea lea o Winfred.
“Jajja,” sa ia fai mai ai, “e faapefea ona tumau lou fiafia i taimi uma?”
“Ou te taumafai lava iai,” o le tala lea a Jajja. “Ae ou te le fiafia i taimi uma. O le faanoanoa o se vaega o le olaga. O e faanoanoa i le taimi nei?”
Na luelue mai le ulu o Winfred. “Ou te misia Taata (Tama), aua o loo galue i se mea mamao atu. Ma ou te misia le aoga, aua e le mafai ona matou o i le taimi nei. Ma ou te misia au uo mai le lotu.”
“E leai se afaina o le lagona faanoanoa e uiga i mea na,” sa fai mai ai Jajja. “E le faigofie le olaga i taimi uma. Ae a ou faanoanoa, ou te taumafai e mulimuli i la’u fua mo le fiafia.”
“O lau fua?”
“E pei lava o le i ai o la’u fua o le matoke, e i ai la’u fua mo le fiafia. O nisi taimi e tele naua le faanoanoa e alu ese ai i le taimi lava lena. Ae o le tele o taimi ou te iloaina ai o lau fua o le mea tonu lena sa ou manaomia e lagona lelei ai.”
“O le a lau fua?”
Sa ataata Jajja. “Aisea e te le vaai ai pe mafai ona e fuafuaina se fua mo oe lava ia? Ona e faamatalaina mai lea ia te au. ”
O le po lena ina ua tatalo Winfred, sa ia iloa sa faafofoga mai le Tama Faalelagi. Sa ia iloaina o le tatalo na faafiafiaina ai o ia! Sa ia maua se fasi pepa ma tusia ai, le Fua a Winfred mo le Fiafia. 1. Tatalo. Ona alu ai lea o ia e moe.
O le taeao na sosoo ai, sa ia faitauina ai lana Tusi a Mamona. O le faitauina o tusitusiga paia sa fiafia ai foi o ia. Sa ia maua lana pepa ma tusia, 2. Faitau tusitusiga paia. Ona ia tilotilo atu lea i le mau sa ia tatalaina atu iai : “Talitonu ia Keriso” (2 Nifae 33:10).
Na faaopoopo iai e Winfred se isi faamatalaga: 3. Ia faatuatua ia Iesu Keriso.
Sa mafaufau Winfred i le lelei o Jajja ma faataga o ia e asiasi atu. Sa maua e Winfred ia Jajja ma fai atu, “Faafetai lava mo le faatagaina o au e nofo ma oe.”
O le faapea atu faafetai na lagona ai e Winfred le fiafia. Sa ia toe tusi i luga o lana pepa. 4. Ia lotofaafetai.
Ona fesili atu lea o Winfred i ona tuaoi pe mafai ona o mai tamaiti laiti e taaalo. Sa ia aumaia lona uso laitiiti o Milfred, ma lona tuagane laitiiti o Alfred. Ina ua maea ona latou taaalo, sa ia valaaulia tamaiti e faitau faatasi ma ia. Sa tipitipi e Jajja le meleni mo i latou uma e faasoa.
Mulimuli ane sa alu Winfred e asiasi i lana uo e igoa ia Fiafia. Sa laua fufuluina faatasi ipu mo le tina o Fiafia. Ona la saluina lea o le foloa. Sa malie le fesoasoani atu!
Ina ua oo i le afiafi, sa fesoasoani Winfred i nai ona tei i a latou meaaoga. Sa ia suesueina le alafapeta faatasi ma Milfred. Sa ia fesoasoani ia Alfred i lana matematika.
O le po lena, sa toe talanoa ai Winfred ia Jajja.
“Ua sili atu lou lagona i le aso! Ou te manatu ua ou maua la’u fua mo le fiafia.”
“Matagofie! Tau mai ia te au,” o le tala lea a Jajja.
“O Le Fua a Winfred mo le Fiafia,” sa ia faitau. “1. Tatalo. 2. Faitau Tusitusiga Paia. 3. Ia faatuatua ia Iesu Keriso. 4. Ia lotofaafetai.”
“O se fua ofoofogia lena,” o le tala lea a Jajja. “Ae ou te manatu atonu ua galo ia te oe se mea. O le a se isi mea na e fiafia i ai i le aso?”
Sa mafaufau Winfred mo se minute. “Ia, sa ou fiafia lava e taaalo ma tamaiti laiti. Ma fesoasoani ia Fiafia ma lona tina. Ma le suesue faatasi ma Milfred ma Alfred. Faatali … o lena! O le fesoasoani atu i isi o le elemene mulimuli lea.”
“Sa’o lelei,” na fai mai ai Jajja. “O le auauna atu i isi e pei lava o le sosi—ua tuufaatasia ai isi mea lelei uma i le tasi.”
“O se fua lelei lena.” Sa ataata Winfred. “Ou te toe fia faataitaia taeao.”
Ata na tusia e Hollie Hibbert