Mealilo ma Mea e Faateia Ai
E alala le tusitala i Iowa, ISA.
O se lagona sa’o le faatumauina o le mealilo a Katie?
“Ua foaiina mai le Agaga o Keriso i tagata uma lava, ina ia iloa ai e i latou le lelei ma le leaga” (Moronae 7:16).
“Ei, vaai!” Na piki i luga e Kate se pepe pepa maanuminumi meataalo mai le fola o le faleoloa. “Ia, tuu i lau taga.”
“E te manao ou te aveina?” Na fesili ai Maddy.
“E le mafai lava ona faatau atu e le faleoloa,” o le tala lea a Kate. “Na ona latou togiina lava i totonu o le lapisi. O se misiona laveai lenei. O loo maua sefeina lenei pepe meataalo!”
Sa ataata Kate ia Maddy. Sa toe ataata mai Maddy.
“Ua lelei.” Na faasee e Maddy le pepe pepa meataalo i totonu o lana taga. Sa maua se lagona faapitoa i le i ai i se misiona laveai!
Ae, a o la savavali ese mai le faleoloa, sa lagona e le pepe meataalo pepa e pei o se maa mamafa i lana taga. Pe faamata o se lagona lena e tatau ona maua i se misiona laveai?
Ina ua latou taunuu atu i le fale o Maddy, sa faapipii ma le faaeteete e Kate ma faamafolafola le pepa pepe meataalo i le mea sili na te mafaia.
“O a ituaiga o lavalava e tatau ona ou faia mo ia?” na ia fesili mai ai, a o piki i luga se valigao. “Ae a ea se ofu talaloa manaia?”
Sa luelue ma le naunautai mai Maddy. “Ona ta faaali atu laia i lo’u tina!”
“Leai! E le mafai ona taua ta’u atu i se tasi, “o le tala lea a Kate. “Leai lava. O la taua mealilo, Ua Lelei? Tauto mai ia te au e te le taua lava.”
“Oi … Ua Lelei. Ou te tauto atu, “na fai mai ai Maddy. “Ae aisea ua le mafai ai ona ta tau’a?”
“Afai e te taua, o le a ita lou tina, ma atonu o le a ia le toe faatagaina ona ta toe taaalo faatasi.”
“Aisea o le a ita ai o ia?” Na fesili ai Maddy. Sa lagona e lona manava le talatala ma le popole.
Sa tuu i lalo e Kate lana valigao. “Afai e te le taua, o le a ou tuua le pepe meataalo ma oe faatasi ma ofu uma ou te tusia mo ia.”
Ia ua iloa nei la e Maddy le mafuaaga na ia lagona ai le matua fefe. “Sa taua … Sa taua gaoia, a ea?”sa ia musumusu atu ai.
“Ei, o oe le tagata na e fafaoina i totonu o lau taga ma aumaia faanana mai i fafo o le faleoloa.”
“Ona ua e fai mai ai ia te au!”
“Ou te le’i fai atu ai!” Fai mai ai Kate. “O le a ou alu i le fale ae e te lei faaoo au i se tulaga pagatia.” Sa tu o ia i luga ma tamoe atu i fafo o le faitotoa.
O le taimi tonu lena na sau ai tina i totonu o le potu. “Aisea na alu faatopetope ai Kate?” Sa ia vaaia le pepe meataalo pepa i lima o Maddy. “Ma o fea sa aumai ai?
Sa ū e Maddy lona laugutu. Na te lei maua se lagona lelei e uiga i le tausia o se mea faalilolilo mai ia tina. Ae faapefea pe afai e sao Kate ma o le a ita tina?
Sa le mafai ona aluese le lagona popole i lona manava. Sa ia manava tele i totonu ma masua atu le tala atoa.
“Fai mai Kate ia te au e tauto atu e tausi faalilolilo,” o lana tala lea. “Ae sa i ai se lagona sese.”
Sa saofai i ona autafa tina i luga o le moega. “O le tele o mea faalilolio e sese. Aemaise lava pe afai e faatonuina oe e aua lava nei tauina atu i se isi. I le isi itu, o se mea e faateia ai, e pei o se meaalofa po o se pati, e mafai ona avea o se mea lelei. E tatau ona malie i tagata uma.”
Sa luelue le ulu o Maddy. “Faafetai mo le le ita ia te au,” na ia fai mai ai. “Na fai mai Kate o le a e ita.”
Sa fusi mau o ia e Tina. “Ou te matuai mitamita lava ia te oe i lou faalogo atu i le Agaga Paia ma tau mai le mea moni.”
“E mafai ona e toe aveina atu au i le faleoloa e toe faafoi le pepe meataalo?” Na fesili ai Maddy.
“Ae faafefea!” Na ataata atu Tina. “Ma pe a taua toe foi mai, e mafai ona e fesoasoani mai ia te au e fai se keke e faateia ai ia tama.”
Sa ata Maddy. “O le mea la lena e mafai ona ou maua ai se lagona lelei!”
Ata na tusia e Devin McSherry