Mga Pioneer sa Matag Yuta
Andrew Jenson
Magsasaysay gikan sa Denmark
Alang kang Andrew, importante ang istorya sa matag tawo.
Mikuha og bolpen si Andrew ug miabli sa iyang journal. Karon, mouli na ako gikan sa akong misyon, misulat siya.
Mipahiyom siya ug mitan-aw sa gawas sa bentana sa tren. Migahin siya sa kataposang duha ka tuig sa Denmark, ang nasod diin siya natawo. Dinhi usab nabunyagan ang iyang pamilya. Mibalhin sila ngadto sa Utah, USA, sa dihang tin-edyer pa siya. Ug sa dili madugay makauban na niya sila!
Gipakli ni Andrew ang pahina ug mipadayon sa pagsulat. Ganahan siya nga mosulat. Ganahan usab siya nga magkat-on mahitungod sa kasaysayan sa Simbahan. Iyang gibasa ang tanan niyang mabasa mahitungod ni Joseph Smith. Gisag-ulo gani niya ang tanang importante nga mga petsa sa kinabuhi ni Joseph Smith.
Sa wala madugay si Andrew nauli na uban sa iyang pamilya. Kada adlaw gitabangan niya sila sa pagtrabaho diha sa umahan. Midaro siya. Mitanom siya. Apan gusto siya nga mobuhat pa og dugang. Gusto siya nga mobasa ug mosulat ug mobiyahe.
Mao nga nag-ampo si Andrew. Naghunahuna siya og maayo mahitungod sa unsay iyang buhaton. Dayon nakahunahuna siya og ideya! Misugod siya sa paghubad sa pipila sa kasaysayan ni Joseph Smith ngadto sa Danish.
Ug kadto lamang ang sinugdanan. Mipadayon si Andrew sa pagsulat, pagbasa, ug paghubad. Misugod siya sa pagtrabaho alang sa Simbahan isip usa ka magsasaysay. Miadto siya sa lain-laing mga dapit sa Estados Unidos. Gipundok niya ang mga istorya ug importanteng papeles.
Usa ka adlaw, ang mga lider sa Simbahan mihangyo ni Andrew sa pagbuhat og butang nga mas makapahinam. Mihangyo sila kaniya sa pag-adto sa nagkalain-laing mga nasod. Isulat niya ang mga istorya mahitungod sa mga miyembro sa Simbahan nga iyang nahimamat. Mahinamon kaayo si Andrew!
Nanamilit si Andrew sa iyang pamilya. Dayon, uban sa iyang gigunitan nga pasaporte, si Andrew mibiyahe na! Mibiyahe siya sakay sa barko. Mibiyahe siya sakay sa tren. Usahay mibiyahe siya sakay sa karwahe o gani sakay sa kabayo o kamelyo.
Bisan asa siya moadto, nakig-istorya si Andrew sa mga miyembro sa Simbahan mahitungod sa ilang mga kinabuhi. Nakig-istorya siya kanila mahitungod sa ilang hugot nga pagtuo. Gisulat niya ang ilang mga istorya aron ang ubang mga tawo makabasa niini. Alang kang Andrew, importante ang istorya sa matag tawo.
Sa dihang miuli si Andrew gikan sa iyang biyahe, gitapok niya ang mga istorya ngadto sa usa ka basahon. Gitudloan niya ang uban mahitungod sa pagsulat sa mga butang ug sa pagtipig niini sa luwas nga dapit.
Malipayon si Andrew nga naghimo sa buhat nga iyang gimahal. Apan usahay naghunahuna siya kon nakahimo ba gayod siya og kalainan. Nakahukom siya nga mag-ampo mahitungod niini.
“Langitnong Amahan, nganong wala man ako gihangyo sa pagbuhat og mas importante nga mga butang?” Usa ka klaro nga tubag ang misantop sa hunahuna ni Andrew. Ang Dios midasig kanimo sa pagbuhat sa trabaho nga imong nahimo.
Mipahiyom si Andrew. Nasayod siya nga iyang gibuhat ang unsay gusto sa Dios nga iyang buhaton. Ug dili siya mohunong!
Natipigan ni Andrew ang mga istorya sa kapin sa 15,000 ka tawo. Makasunod kita sa iyang ehemplo pinaagi sa pagsulat sa atong kaugalingong mga istorya sa pamilya. Importante ang istorya sa matag tawo—lakip ang inyoha!
Ang usa ka magsasaysay mosulat ug motipig og mga istorya aron kat-onan sa mga tawo sa umaabot nga adlaw.
Karon, adunay usa ka templo sa Denmark.
Hapit sa 17,000 ka Danish nga mga Santos ang mibalhin sa Utah sa tunga-tunga sa mga 1800, sama sa gibuhat ni Andrew.
Misulat si Andrew og 27 ka basahon ug sobra sa 2,000 ka artikulo sa pamantalaan.
Mibiyahe siya og dul-an sa usa ka milyon ka milya (1.6 ka milyon ka kilometro)!
Si Andrew miserbisyo og dugang pa nga siyam ka misyon—sa Denmark, sa laing mga bahin sa Europe, ug sa Estados Unidos.
Mga paghulagway pinaagi ni Christopher Thornock