Atong Dapiton ang Tanan
Ang tagsulat nagpuyo sa Utah, USA.
Gusto ni Jarom nga motambong ang iyang tibuok pamilya sa iyang bunyag.
“Ang akong pamilya gusto kong kauban, ug ako Iyang gitudloan” (Songbook sa mga Bata, 98).
Milingkod si Jarom sa kasagbotan diha sa atubangan sa marae sa iyang lola. Hapit na magsugod ang salo-salo sa pamilya!
Mihangad siya sa pula nga mga kinulit sa kilid sa gambalay. “Ma, unsaon sa pagsulti sa ngalan ni Lola sa sinyas nga pinulongan [sign language]?” nangutana siya. Ang lola ni Jarom nabungol. Usahay nagbansay sila og sinyas nga pinulongan aron sa paghinumdom kaniya.
“Sama niini,” miingon si Mama. Hinay-hinay niyang gisinyas ang ngalan gamit ang iyang mga kamot. Gihimo usab ni Jarom ang mga sinyas gamit ang iyang mga kamot. Ganahan siya nga magkat-on mahitungod sa iyang pamilya.
“Gusto ko nga mosulay!” Milingkod tupad nila ang ig-agaw ni Jarom nga si Kati. Gisinyas usab ni Mama ang ngalan.
“Sunod bulan alang sa akong bunyag, mahimo ba kitang manganta og awit gamit ang sinyas nga pinulongan?” Nangutana si Jarom.
“Siyempre,” miingon si Mama.
“Unsa ang bunyag?” Nangutana si Kati.
Kadaghanan sa pamilya ni Jarom dili mga miyembro sa Ang Simbahan ni Jesukristo sa mga Santos sa Ulahing mga Adlaw. “Ang pagpabunyag usa ka espesyal nga butang sa akong simbahan,” miingon si Jarom. “Kini ang higayon nga mosaad ka nga mosunod ni Jesus, ug Siya mosaad nga motabang kanimo.”
“Nindot,” miingon si Kati.
“Ganahan ka ba nga motambong sa akong bunyag?” Nangutana si Jarom.
“Sige ba!” Mipahiyom si Kati. Dayon milingi si Jarom sa iyang mama.
“Mahimo bang hangyoon nato ang ubang mga ig-agaw nga motambong usab? Ug ang akong mga iyaan ug mga uyoan?”
Mitando si Mama. “Nagtuo ko nga nindot kana nga ideya.”
Gihangyo ni Jarom ug ni Mama ang uban sa pamilya sa pagtambong sa bunyag. Ang mga iyaan ug ang mga uyoan wala kaayo masayod usab mahitungod sa bunyag. Apan nasayod sila nga kini usa ka espesyal nga adlaw alang ni Jarom. “Moadto mi!” miingon sila.
Milabay ang pipila ka semana. Sa kataposan adlaw na sa bunyag ni Jarom! Sa dihang misulod si Jarom sa chapel, mipahiyom siya og dako. Ang matag linya sa lingkoranan napuno sa iyang mga sakop sa pamilya!
Una mihatag og pakigpulong ang papa ni Jarom mahitungod sa bunyag ug sa gasa sa Espiritu Santo. Gihisgotan usab niya kon unsa ka importante ang mga pamilya. “Kami malipayon kaayo nga mabunyagan si Jarom karon. Ug kami malipayon kaayo nga ikauban namo ang among pamilya!” miingon siya. “Unsa man ang labing importanting butang sa kalibotan?” nangutana siya. “Kini mao ang mga tawo, ang mga tawo, ang mga tawo.”
Mipahiyom ang tanan. Kadto usa ka Māori nga panultihon nga gimahal nilang tanan.
Human sa pakigpulong ni Papa, turno na ni Jarom ug ni Mama. Nanganta sila og awit sa Primary gamit ang sinyas nga pinulongan. Kini mipabati ni Jarom nga duol sa iyang lola.
Dayon miadto si Jarom ug si Papa sa bunyaganan. Samtang nagbarog siya diha sa tubig, mitan-aw si Jarom sa iyang tanang pamilya. Mga ig-agaw, mga iyaan, mga uyoan. Silang tanan anaa didto!
Mipiyong si Jarom. Mibati siya og mainiton, kalma nga pagbati. Gibati niya nga daw may migakos niya pag-ayo. Naghunahuna siya sa iyang lola. Naghunahuna siya sa iyang mga katigulangan. Nasayod siya nga mapasigarbuhon usab sila kaniya.
Nag-ilis si Jarom og uga nga mga sinina. Dayon gigakos niya ang matag sakop sa iyang pamilya. Mapasalamaton siya alang kanilang tanan. Ug mapasalamaton siya alang sa iyang mga sakop sa pamilya nga anaa sa langit nga iyang mahimamat sa umaabot nga adlaw. Gusto si Jarom nga magpadayon sa paghimo og maayong mga pagpili aron mahimo silang mapasigarbohon.
Mga paghulagway pinaagi ni Oksana Grivina