Si Helaman Naghunahuna
“Mga email lang kini. Family history ba kana?”
“Ang mga kasingkasing sa mga anak mobati sa ilang mga amahan” (Doktrina ug mga Pakigsaad 2:2).
Si Helaman naghunahuna mahitungod sa daghang butang. Naghunahuna siya mahitungod sa siyensya ug sa kasaysayan. Ug naghunahuna siya kon unsa sama ang mga butang sa dihang ang iyang mga apohan pareho sa iyang edad.
Usa ka adlaw gipatid-patiran niya ang bola sa soccer sa koral sa gawas. Pabalik-balik niya kining gipatid-patiran.
Unsa kaha ang mga matang sa mga dula nga gidula sa gawas sa mga bata sa dugay nang panahon kaniadto, naghunahuna siya. Ang iyang mga apohan ba nagdula usab og soccer sa dihang mga bata pa sila?
Gihunong ni Helaman ang bola gamit ang iyang tiil. Kadiyot lang … makapangutana siya kanila!
Paspas siyang midagan sa sulod paingon sa computer ug mi-log in sa iyang email account. Si Mama ug Papa mihimo og email account alang lang kaniya. Gigamit niya kini sa pag-email sa iyang pamilya nga nagpuyo sa layo. Milingkod siya ug mi-type og email para kang Lola Barnes.
Si Helaman naghunahuna …
Unsa ang imong paborito nga dulaon sa gawas sa dihang bata ka pa? Ang ako kay soccer.
Nahigugma,
Helaman
Klik! Gipadala niya ang iyang pangutana. Gipadala niya ang samang pangutana ngadto kang Lolo Barnes. Dayon iya kining gipadala usab ngadto ni Lola ug Lolo White.
Pagkasunod adlaw, gisusi ni Helaman ang iyang email. Siya adunay duha ka bag-ong mga mensahe! Giklik niya ang una aron maabli.
Hi, Helaman!
Ang paborito nakong dulaon sa gawas mao ang mga munyeka nga papel. Ang akong mga higala ug ako mosab-it og habol aron sa paghimo og gamay nga balay. Ganahan usab ko magdula og jackstone ug biks [hopscotch] ug magbisikleta.
Nahigugma,
Lola White
Gibasa niya sunod ang email ni Lolo White.
Hi, Helaman,
Sa dihang bata pa ko, kami walay mga TV o mga computer. Mao nga pirme kaming magdula sa gawas. Sa ting-init maglangoy-langoy kami, ug sa tingtugnaw mag-ice-skating kami. Ganahan usab ko magdula og sakmiton ang bandila [capture the flag] uban sa akong mga higala.
Nahigugma,
Lolo White
Mipahiyom si Helaman. Makalingaw nga magkat-on kabahin sa iyang mga apohan!
Milabay ang mga adlaw, ug si Helaman nagpadayon sa paghunahuna. Matag higayon nga siya naghunahuna, nangutana siya sa iyang mga apohan. Ug nakahibalo siya og daghan mahitungod kanila!
Nakahibalo siya nga si Lolo Barnes mikuha og mga klase sa sayaw sa ballroom. Si Lola Barnes ganahan nga mosag-ulo og mga pulong ug mohimo og mga scrapbook. Si Lola White kaniadto mahadlok sa pagkanta sa atubangan sa mga tawo. Apan sa wala madugay mikanta siya sa iyang gradwasyon sa high school. Nakakat-on si Lolo White unsaon sa paghimo og modelo nga mga eroplano sa dihang gamay pa siya, ug ganahan pa gihapon siya sa paghimo niini.
Mikatawa si Helaman sa dihang gibasa niya ang mahitungod sa tigulang nga iring ni Lola White, si Tommy. Kaniadto iyang gisul-oban ang iring og mga sinina sa monyeka ug isuroy-suroy kini sakay sa stroller sa monyeka.
“Unsay imong gibasa diha, Helaman?” Nangutana si Papa.
“Email kini gikan ni Lola White,” miingon si Helaman. “Duna akoy mga pangutana niya.”
Gipakita ni Helaman kang Papa ang tanang email nga iyang gipadala ug nadawat gikan sa iyang mga apohan.
“Murag nakapundok ka og talagsaon nga mga istorya sa family history!” Miingon si Papa. “Unsa kaha kon ibutang nato kini sa FamilySearch?”
Gitakilid ni Helaman ang iyang ulo. “Mga email lang kini. Family history ba kana?”
“Oo!” Miingon si Papa. “Sa matag higayon nga magkat-onan ka mahitungod sa imong pamilya, family history kana. Nindot nga ideya nga tipigan kini nga mga istorya aron mahinumdoman nato kini unya. Dia. Pakit-on tika.”
Gitabangan ni Papa si Helaman nga mo-log in sa FamilySearch.org ug mo-type sa tanang butang nga gisulti sa iyang mga apohan kaniya.
“Karon ang mga istorya na-save na aron mabasa kini sa atong pamilya unya. Dili ba kana nindot?” Nangutana si Papa.
“Oo!” Mipahiyom si Helaman. “Ug ako adunay daghan pang gustong ipangutana.”
Mga paghulagway pinaagi ni Gareth Conway