Imong Sinulat
Naghulat Sila Kanako!
Ganahan na kaayo ko nga magpabunyag alang sa akong mga katigulangan!
Hi! Ako si Giselle Olivia. Natawo ko sa India. Gihigugma ko si Jesukristo. 2.3 lang ka porsyento sa mga tawo sa India ang mga Kristiyano. Oo, lisod kini usahay. Apan ako nasayod nga Siya motabang kanako ug mogiya kanako. Ug karon ang Simbahan nagtukod og templo sa India!
Nagpuyo ko sa usa ka matahom nga siyudad sa minilyon ka mga tawo. Taliwala sa tanang minilyon, adunay unom ka tawo nga akong gimahal pag-ayo: ang akong mama; akong manghod nga babaye, si Halle; akong mahigugmaong mga apohan; akong uyoan; ug ang akong iyaan. Sila ang labing importante nga mga tawo sa akong kinabuhi.
Niining tuiga gibuhat namo ang pipila ka mga kalihokan sa family history, ug nailhan nako sa akong katigulangan. Miingon si mama nga ang kababayen-an ug kalalakin-an sa akong pamilya adunay tag-as og buhok, sama nako. Dayon misulti siya og usa ka importanteng butang: ang akong mga katigulangan naghulat kanako didto sa kalibotan sa espiritu! Miingon siya nga naghulat sila aron mabunyagan—sama ra nga ako kinahanglan nga maghulat hangtod nga nag-otso anyos ko nga magpabunyag. (Lain pay ato, nabunyagan diay ko sa akong adlawng natawhan! Nindot, no?)
Miingon si mama nga ang akong mga katigulangan anaa sa kalibotan sa espiritu. Wala silay mga lawas sama kanako, mao nga sila dili mabunyagan. Subo kaayo! Mao nga kita kinahanglan magpabunyag alang kanila diha sa templo. Gisultihan nako si Mama nga sa higayon ang templo matukod sa Bengaluru, ug sa higayon nga ako anaa na sa igong pangidaron, gusto ko nga magpabunyag alang kanila.
Nalipay kaayo ko nga umaabot ang usa ka templo sa India! Usa kini ka dakong panalangin tungod kay si Mama dili makadala kanamo ngadto sa mga templo sa uban nga mga nasod. Layo kaayo kini.
Nakadungog ko nga ang mga tanaman sa templo adunay daghang matahom nga mga bulak. Busa ako mahinamon ko nga makakita sa tanaman sa dihang gitukod ang templo. Apan labaw sa tanan, ganahan na ko nga magpabunyag sa akong mga katigulangan. Gihigugma nako ang akong pamilya, ug akong gihigugma ang akong mga katigulangan.
Nakaadto na ba kamo sa templo? Kumusta man kana? Manghinaot ko maanindot kadto!
Mao kini ang hitsura sa Bengaluru India Temple kon mahuman na kini!
Mga Paghulagway ni Patricia Castelao