Gaoioiga o le Sau, Mulimuli Mai ia te A’u
Mo afiafi faaleaiga, suesueina o tusitusiga paia, pe tau lava o le fiafia!
O Lo Tatou Aiga Faalelagi
Mo le Mose 1; Aperaamo 3
Tala: Sa tatou nonofo faatasi uma ma Iesu ma le Tama Faalelagi ae tatou te le‘i fananau mai. Na faia e le Tama Faalelagi se fuafuaga mo i tatou e o mai ai i le lalolagi. (Tagai Aperaamo 3:24–25.)
Pese: “Ua Ou Iloa o Soifua Lo’u Tama,” (Tusipese a Tamaiti, 8)
Gaoioiga: Faitau le tala mai tusitusiga paia i le itulau e 8. Ona fai lea o ni ata maa! Ao mai ni maa eseese. Fai se vaaiga o le Tama Faalelagi, Iesu, ma oe ae tatou te le‘i o mai i le lalolagi.
Taaloga o Manatuaga Faafetai
Mo le Kenese 1–2; Mose 2–3; Aperaamo 4–5
Tala: Na ta‘u atu e le Tama Faalelagi ia Iesu Keriso e foafoa le lalolagi mo i tatou e ola ai (tagai i le Kenese 1–2). Na foafoaina e Iesu laau ma manu mo i tatou e tausia. E mafai ona tatou faafetai mo le lalolagi.
Pese: “E Alofa Lo’u Tama Faalelagi Ia Te A’u” (Tusipese a Tamaiti, 16–17)
Gaoioiga: Ia fai se taaloga! Fai mai le tagata muamua, “Ou te faafetai mo …” ona fai mai lea o se mea na foafoaina e le Tama Faalelagi ma Iesu. E toe fai e le isi tagata e toe e sosoo ai ona faaopoopo lea i ai o se mea fou. Ia faaauau pea i se li‘o i le umi e te mafaia.
Togi o Filifiliga Lelei
Mo le Kenese 3–4; Mose 4–5
Tala:I le Faatoaga o Etena, sa filifili ai Eva e ai le fua o le laau o le malamalama. Sa ia ofoina atu le fua ia Atamu. Sa ia filifili foi e ai le fua o le laau. (Tagai i le Mose 4:12.) Ina ua uma ona la‘ua aai i le fua, sa la‘ua aoaoina le eseesega i le va o le sa‘o ma le sese.
Pese: “Filifili le Ala Sa’o” (Tusipese a Tamaiti, 82)
Gaoioiga: Saofai i se li‘o ma togi solo se polo. A e sapoina le polo, faamatala atu e uiga i se filifiliga lelei sa e faia i lenei vaiaso.
Tusi o Molimau a le Aiga
Tala: Na faia e le aiga o Atamu ma Eva se “tusi o manatuaga” (Mose 6:5). Sa latou tusia e uiga ia Iesu Keriso ma le fuafuaga a le Tama Faalelagi. O lenei tusi o le amataga lea o tusitusiga paia.
Pese: “O Loo Tautalagia Iinei Le Alofa” (Tusipese a Tamaiti, 102–103)
Gaoioiga: E mafai foi ona e faia se tusi o manatuaga! Fai atu i tagata uma o lou aiga e tusi i lalo a latou molimau ia Iesu Keriso. Faapipii faatasi ia itulau e fai ai se tusi. Faaopoopo i lau pusa o oa i le itulau 30.
Fausiaina o le Alofa
Mo le Mose 7
Tala: Sa fausia e Enoka ma lona nuu se aai e ta‘ua o Siona. O tagata i Siona sa amiotonu ma “sa tasi o latou loto ma tasi le mafaufau” (Mose 7:18). O lona uiga sa latou alolofa ma tausia e le tasi le isi. Latou te le‘i tau pe faatiga le tasi i le isi.
Pese: “A I Ai i le Aiga,” (Viiga, nu. 181)
Gaoioiga: Faitau le Mose 7:19–21. Ona fausia lea o se aai i poloka, maa, po o laau. A o e fausia, talanoa e uiga i auala e mafai ona e faia ai lou aiga ia avea atili e pei o Siona. E mafai ona e auina atu ata o lou aai ua mae‘a i le Uo!
Ata na tusia e Katy Dockrill