Api Talaaga a Papa
O lenei tala sa tupu i Tahiti.
Sa nofo Allan i luga o se nofoa i fafo o lona fale. Sa goto le la. O laau pama e tutu faasaga i le lagi lanu piniki ma le lanumoli.
Sa ia susueina le itulau o le tusi sa ia faitauina. Sa leai ni ata. Ae sa le‘i afaina ia Allan. Sa fiafia o ia e faitauina lenei tusi!
Sa faasolo lana vaai i le manaia o tusiga a Papa. Sa ia manatuaina le vaega lenei! E ‘ata ai lava o ia i taimi uma.
O le taimi lava lena, na sau ai Papa i fafo. “O le a se mea malie tele?”
“O loo ou faitauina se tasi o au tusi.” Sa ataata Allan. “Ou te fiafia i le vaega e uiga i le popo.”
“Oi, o na e te faatatau i la‘u api talaaga.” Sa nofo Papa i autafa o Allan. “Latou te faamatalaina le tala o lo‘u olaga. Ae e le na o a‘u e faatatau i ai. O loo e i ai foi i totonu. E faapena foi Mama, ma o ou uso ma tuafafine.”
“Pei o Nifae!” Na fai atu ai Allan. “Sa ia tusia ni tala e uiga i lona olaga, ma sa ia tusi foi e uiga i lona aiga.”
“E sa’o!” Na fai mai ai Papa.
“Ou te fiafia tele i vaega e uiga ia te oe,” o le tala lea a Allan. “E pei o le avea ai o oe o se faifeautalai iinei i Tahiti.”
“Ou te fiafia tele i tala e uiga ia te oe,” o le tala lea a Papa. “Na e iloa na matou faaigoaina oe i le igoa ogatotonu o Elder Bednar?”
“E te le‘i fai mai lava ia te a‘u lena mea! E le mafai ona ou faatali e faitau lena vaega.”
Sa ataata Papa. “E tele tala i a‘u api talaaga. Sa ou tusitusi i api talaaga talu mai le valu o o‘u tausaga.”
“Talu mai lou valu tausaga?” O le fesili lea a Allan. “O se taimi umi tele tele lena.”
Sa ata Papa. “Ou te le o toeaina tele.”
Sa mafaufau Allan mo sina taimi. “E le o toe mamao ona atoa lea o lo‘u valu,” o lana tala lea. “E mafai ona ou maua se api talaaga mo lo‘u aso fanau?”
“Ioe!” Na fai mai ai Papa.
“Ona mafai lea ona ou tusia a‘u tala ina ia i ai se aso e mafai ai e la’u fanau ona faitau i ai.”
“E foliga mai o se tu masani maoae faaleaiga!” Na fai mai ai Papa.
Ata na tusia e Alessia Girasole