O Pese ma Putaputa Fasimoli
Sa ata Alice ina ua ia mafaufau e uiga ia Peresitene Kimball sa pese faatasi ma se povi.
Sa faapalasi e Alice se asu o saimini i totonu o le ipu supo a lona tuagane. Sa alofa o ia i ona tuagane ma uso laiti—o i latou uma e toalima! Sa lelei le faalagona i le fesoasoani atu ia i latou. Ae sa faigata i isi taimi le avea ai ma ulumatua. Talu mai lava le taimi na sau ai le pepe fou i le fale, sa tatau ai ona fesoasoani tele o ia. Sa tele naua mea sa tutupu i totonu o lona fale!
“O le a se mea na e aoaoina i le lotu i lenei aso?” O le fesili lea a Tama.
“Iesu!” O le tala lea a le uso laitiiti o Alice o Sara. Sa ia oloina le sosiapu i luga o lana ipu.
Sa ataata Alice. Sa ese le aulelei o Sara. Ma e mesi foi.
“Sa ou aoao e uiga ia Peresitene Kimball …” Sa amata ona fai atu ai Alice. Ona valaau atu lea o Tina mai le isi potu. Sa ia manaomia le fesoasoani a Tama i le pepe.
“Faamalie atu,” sa fai atu ai Tama. “Ou te toe vave mai lava.”
A o fesoasoani Tama ia Tina, sa fesoasoani Alice i isi tagata uma. Sa pa‘u ifo i lalo le ipu susu a Eric. Sa faamama e Alice. Na amata ona tagi Sara. Sa opo o ia e Alice. Sa toe manao Clara i se saimini. Sa avatu e Alice ia te ia.
E oo lava ina ua toe foi mai Tama, sa pisapisao lava ma mesi le umukuka. Sa moomoo Alice maimau pe ana faigofie atu ona lagona le toafilemu.
Na iu lava na mae‘a le ‘aiga o le aoauli. Sa fesoasoani Alice i ona tei e ave a latou ipu i le tapu fufulu ipu. Sa lava le matua o Alice e le taei ai ni mea. O lea sa nafa ai o ia ma le fufuluina o ipu. Sa ia faatumuina le tapu fufulu ipu i le vai fasimoli.
Maimau pe ana ou le faia lava ni feau, Sa mafaufau ai Alice. Ona ia manatua lea o mea sa ia aoaoina i le Peraimeri e uiga ia Peresitene Spencer W. Kimball. A o laitiiti o ia, sa ia faia foi ni feau. Sa masani ona ia usuina viiga a‘o tatau susu o le povi!
Na vaai faalemafaufau Alice ia Peresitene Kimball o usuina se pese taitoalua ma se povi. Sa ata o ia.
Ona oso a‘e lea o sona manatu. E mafai ona pei o ia o le perofeta! Sa ia aumaia le tusipese ma susue i le viiga muamua.
Sa taumafai ina ia matala pea. Sa tuu e Alice le tusi i luga o le faamalama. Sa ia tuuina le tasi pito o le tusi i tua o se laau toto. Ona ia tuu lea o le isi pito i tua o se ipu mamafa. O lea la ua mafai ona ia vaai i ai a o fai ana feau.
A o fufulu e Alice ia ipu supo, ipu inu, ma sipuni, sa ia usuina le viiga. O putaputa mafanafana, o fasimoli sa lagona lelei i ona lima. Ma o le pese na faafiafiaina ai lona loto.
O le aso na sosoo ai, sa toe pese foi Alice. Ma leisi aso na sosoo ma lena. Sa taumafai o ia e manatua upu o viiga taitasi. Ona ia agai atu lea i le isi. Sa aoaoina foi e Alice ni viiga fou! Sa ia faia ni lesona piano mo ni nai tausaga. Ina ua ia le iloaina se viiga, sa ia aoaoina ia faamatalaga i luga o le piano.
E le‘i umi ae le toe amanaia e Alice le fufuluina o ipu i taimi uma. O nisi taimi sa fiafia i ai o ia! Sa manaia le pese ma mafaufau e uiga ia Iesu. O le aoaoina o viiga fou taitasi sa pei lava o le faia o se uo fou. Po o le a lava le leotele o le olaga na siomia ai o ia, o viiga na fesoasoani ia te ia e lagona ai le filemu.
Ata na tusia e Erin Taylor