Tusia e Oe
O le Lototele mai le Agaga Paia.
Sa ou taoto i lo‘u moega ina ua uma ona sau lo‘u tina e faamoe a’u mo le po. Sa ou mafaufau i ni mealilo sa ou taofia. Na faatumulia lo’u mafaufau i le ta‘usalaina. Ona ou manatua lea e tatalo. A o ou faia, sa ta‘u mai e le Agaga Paia ia te a‘u e talanoa i lo’u tina e uiga i le mea sa i lo‘u mafaufau.
Mo ni mafuaaga, sa ou le fia talanoa ai i lo‘u tina e uiga i ai. Sa ou iloa sa taumafai Satani ia ou lagona le fefe. Sa ou iloaina foi e ala i le Agaga Paia o le talanoa atu i lo‘u tina o le mea sa’o lea e fai.
Mulimuli ane, sa ou maua le lototele e alu ai e fesili i lo‘u tina pe mafai ona ma talanoa. Sa ou ta‘u atu ia te ia mea uma e uiga i le mea sa ou faia ma o’u lagona. Sa ou te‘i, sa le‘i ita lava o ia. Sa ia ta‘u mai ia te a‘u lona fiafia tele ona sa lava lo‘u lototele e talanoa atu ai ia te ia. Sa ma feopoa’i, ma sa ou fai atu ia te ia e faamagalo a‘u. Sa ou lagona le toafilemu ma le fiafia.
Sa ou toe tatalo i lo‘u Tama o i le Lagi ma ole atu ia te Ia e faamagalo foi a’u. Sa matuai manaia le lagona o le mulimuli i le Agaga ma fai le mea sa‘o. Ou te faafetai mo Iesu, o le na faia ina ia mafai ona ou salamo pe a ou faia se mea sese. Ou te faafetai foi mo le Agaga Paia, o le sa fesoasoani ia ou maua se lagona lelei. Ma ou te faafetai mo se tina alofa o le e faalogo ma malamalama ia te a‘u.
Ata na tusia e Adam Howling