E Le o Tuua Nao Oe
O lenei tala sa tupu i Ecuador.
Sa moomoo Damián maimau pe ana mafai e lona aiga ona o mai faatasi uma i le lotu.
Sa tilotilo atu Damián i lana ato faafafa e iloa ai sa ia te ia le mea sa ia manaomia. Laei o le lotu? Siaki. Seevae? Siaki. Tusi a Mamona? Siaki. Sa ia sipi i luga lana ato faafafa, tuu i luga o lona tau‘au, ma agai atu i le faitotoa.
“Mamá!” O le valaau lea a Damián. “O le a ou alu ia Abuela(tina matua) ma Abuelo(tama matua)!”
Sa gaugau solo a Mamá. “Ia mautinoa e fesoasoani i ou matua matutua.” Sa tu o ia e tuu atu ia Damián se opo lapoa. “Ou te iloa e te fia alu i le lotu faatasi ma i la‘ua. Ia manuia le aso a taeao.”
“Ia!” o le tala lea a Damián. Ae ou te moomoo maimau pe ana tou o mai faatasi ma a‘u, sa ia mafaufau ai.
Sa savali atu Damián i le fale faatali pasi. O Aso Toonai uma lava, sa ia alu atu ai i le pasi e sopoia ai lona taulaga i Ecuador i le fale o Abuela ma Abuelo. Sa nofo o ia faatasi ma i la‘ua i le po. Ona ia alu lea i le lotu ma i la‘ua i le aso na sosoo ai.
I le taeao o le Aso Sa, na fai ai lavalava o Damián mo le lotu. Sa faamau lona ofutino. Sa faamaulu ona seevae. Ona ia savali atu lea i le lotu faatasi ma Abuela ma Abuelo.
Sa fiafia Damián i le lotu. Sa fiafia o ia e usuina pese ma ‘ai ma inu i le faamanatuga. Sa fiafia foi o ia e vaai i ana uo. Ae sa ia moomoo maimau pe ana i ai le isi vaega o lona aiga faatasi ma ia.
O lena aoauli, sa savavali atu ai Damián, Abuela, ma Abuelo i le fale o Brother ma Sister Ruiz. O le a latou faia faatasi se afiafi faaleaiga. Na aumai e Abuela se ipu flan(ituaiga puligi) mo le aiga o meaai suamalie.
O le lesona e faatatau ia Iesu. Sa valivali e Damián se ata o Iesu a o ia faalogologo i le lesona. “E malamalama Iesu i mea uma tatou te lagonaina,” o le tala lea a Brother Ruiz. “E tusa lava pe tatou te lagona le faanoanoa.”
Sa tilotilo atu Damián i lana ata o Iesu. Sa fiafia ai o ia ona sa silafia e Iesu ona lagona.
Ina ua mae‘a le tatalo faaiu, sa fai mai Abuela, “Sa ou aumaia se flan. O ai e manao i ai?”
“O au?” Na fai atu ai Damián. O le meaai kulimia, suamalie e sili ona fiafia i ai Damián! Ma sa faia e Abuela le flan sili ona manaia.
Ina ua uma le afiafi faaleaiga, sa savavali atu Abuela ma Damián i le fale faatali pasi ina ia mafai ona o ai i le fale. Sa tilotilo ifo Damián i lalo o le eleele.
“O i ai se mea ua tupu?” O le fesili lea a Abuela.
Sa faauu Damián. “Ou te moomoo maimau pe ana o mai uma lo‘u aiga i le lotu faatasi ma i tatou.”
“E faapena foi a’u,” o le tala lea a Abuela. Sa ia fusi mai Damián. “Ae e alofa tele lou aiga ia te oe. Ma e faapena foi a‘u ma Abuelo ma le toatele o isi!”
Sa tu mai le pasi. Sa saofai Damián i tafatafa o le faamalama ma talotalo atu ia Abuela a o alu ese atu le pasi.
Sa mafaufau Damián e uiga i mea na fai atu ai Abuela. Sa ia mafaufau ia Mamá ma lona uso ma lona tuafafine. Sa ia iloaina sa latou alolofa tele ia te ia. Ona mafaufau lea o ia i lona faiaoga o le Peraimeri. Ma le aiga o Ruiz. Ma Abuela ma Abuelo. Sa latou alolofa uma foi ia te ia.
O le mea sili lava, na iloa e Damián e alofa le Tama Faalelagi ma Iesu ia te ia. Ma o lena mea na ia le toe lagona ai le tuuatoatasi
Ata na tusia e Julissa Mora