O Paionia i Atunuu Uma
Ua Maua e Dinis se Tali
Sa ii le faamalu o le moega fata lua a o taavale atu Dinis i le isi itu. Sa ia feliuai ma minoi solo i le po atoa. Ae sa le mafai ona moe o ia!
Ae faapefea pe afai e sese faifeautalai? Sa mafaufau ai Dinis. Ae faapefea pe afai e le o le ekalesia moni lenei? Ae faapefea pe afai o loo ou i ai i le ala sese? Sa faaauau pea ona faalavelave fesili ia te ia.
Na auai le aiga o Dinis i le Ekalesia i le lua tausaga na muamua atu, ina ua 10 ona tausaga. Ina ua faatoa aoaoina i latou e faifeautalai, sa lagona e Dinis i le taimi lava lena e moni mea sa latou aoaoina atu. O Dinis ma lona aiga o nisi ia o uluai tagata na auai i le Ekalesia i Potukale. O Dinis o se paionia!
Ae talu ai nei sa amata ai ona popole o ia. Ae faapefea pe afai o le papatisoina e le o le filifiliga sa‘o lea?
Sa le‘i ta‘uina atu e Dinis i se tasi sa popole o ia. E le o ona uso po o lona tuafafine. E oo lava i ona matua. Ae o le po nei, na pau lava lea o le mea sa mafai ona ia mafaufau i ai.
Sa mapuea Dinis. Sa ia tilotilo ifo i lalo i le pito o le moega. Sa momoe ona uso i luga o le moega i le pito i lalo. Sa na’o Dinis.
Sa ia iloa e tatau ona ia ole atu i le Atua pe moni le Ekalesia. Sa tootuli o ia i le ogatotonu o lona moega. Sa punou lona ulu ma amata ona tatalo.
“Faamolemole, le Atua,” o le talanoa lemu lea a Dinis. “Faailoa mai ia te a‘u pe sa vaai moni lava Iosefa Samita ia te oe ma Iesu.”
Sa tatalo Dinis i le tele o taimi muamua. Ae o le taimi lenei sa ese. Sa matuai manaomia lava ona iloa e Dinis. Sa ia tatalo malosi atu nai lo se isi lava taimi mo se fesoasoani.
“Ou te le fia sese,” sa ia musumusu atu ai. “Ou te fia iloa po o le a le mea sa‘o.”
Ona lagona lea e Dinis se mea. Sa malosi ma mafanafana le lagona. Sa tuputupu a‘e seia oo ina ia lagonaina i lona tino atoa. Sa ia lagonaina ua faatumuina o ia i le olioli!
Na iloa e Dinis o le lagona o le Agaga Paia. Ua tali mai le Atua i lana tatalo! Sa sa‘o faifeautalai. O Iosefa Samita lava o se perofeta. Ma o le papatisoina sa le na o se filifiliga lelei. O le filifiliga sili lea.
Na taoto Dinis i lona tua ma tilotilo atu i le faalo. Ua mou atu ona popolega. Sa ia toso maia lona palanikeke i ona autafa. Ae na te le‘i iloaina, sa moe o ia.
A o faasolo ina matua Dinis, sa ia manatua pea le po ina ua ia tatalo i lona moega. Sa ia iloa sa i ai o ia i luga o le ala sa‘o o se tagata o le Ekalesia a Iesu Keriso. Ma sa ia iloa o le a faafofoga mai pea le Tama Faalelagi i ana tatalo.
O Potukale o se atunuu i Europa i sisifo.
E tasi le malumalu o Potukale. Sa faapaiaina i le 2019.
O Potukale e i ai le faletusi aupito matua i le lalolagi.
Sa papatisoina Dinis i se vaitaele aau i le fale o le misiona.
Sa ia auauna atu i se misiona i atumotu mai le talafatai o Sepania, Potukale, ma Aferika.
Sa auauna atu Dinis ma ona tei uma e toatolu i ni misiona i le taimi lava e tasi!
Ata na tusia e Sammie Francis