Mei he Kau Palesitenisī ʻUluakí

Ko ha Potu Toputapu

Fai ʻe Palesiteni Henry B. Eyring

Tokoni Ua ʻi he Kau Palesitenisī ʻUluakí

Toʻo mei he “Fie Siofia ha Temipalé,” Liahona, Mē 2021, 28–31.

ʻOku ou manatuʻi ʻa e fuofua ʻaho naʻá ku hū ai ki he Temipale Salt Lake. Naʻe fakafeʻiloaki mai kiate au ha fefine ʻulu hinā ʻi ha kofu temipale hinehina. Naʻá ne pehē mai, “ʻE Brother ʻAealingi, ʻoku talitali lelei koe ki he temipalé.” Ne u fakakaukau ʻi ha kiʻi momeniti ko ha ʻāngelo ia koeʻuhí naʻá ne ʻiloʻi hoku hingoá. Naʻe ngalo ʻiate au ne pineʻi ki hoku koté ha kiʻi kaati siʻisiʻi mo hoku hingoá ai.

Naʻá ku sio hake ki he ʻaofi hinehina māʻolungá. Naʻe fuʻu maama fau ʻa e lokí ʻo hangē naʻe ʻatā ia ki he langí. Ne u ongoʻi naʻá ku ʻosi ʻi ai kimuʻa. Naʻá ku ongoʻi leva ne u ʻi ha feituʻu toputapu pehē kimuʻa pea fāʻeleʻi aú.

ʻOku tohi ʻa e kupuʻi lea “Māʻoniʻoni ki he ʻEikí” ʻi tuʻa ʻi hotau ngaahi temipalé kotoa. ʻOku ou ʻiloʻi ʻoku moʻoni e ngaahi lea ko iá. Ko e temipalé ko ha feituʻu māʻoniʻoni ia ʻe lava ke tau maʻu ngofua ai ʻa e fakahaá ʻo kapau ʻoku fakaava hotau lotó ki ai.

ʻOku ou lotua te ke fie ʻalu ki ai, ke ke ongoʻi ofi ki he ʻEikí. Te ke lava ʻo tokoni ki hoʻo ngaahi kuí ke nau ʻiate Ia pea mo koe ʻo taʻengata.

Lea ʻo e Ongoongoleleí

Ko e fakahaá ko ha pōpoaki ia mei he ʻOtuá ki Heʻene fānaú. ʻOku faʻa hoko mai ʻa e fakahaá ʻo fakafou ʻi he Laumālie Māʻoniʻoní. Naʻe fakahā ʻe he Laumālie Māʻoniʻoní kia Palesiteni ʻAealingi, naʻá ne ʻi ha feituʻu toputapu ʻo hangē ko e temipalé kimuʻa pea fanauʻi iá.

Fie Siofia Ha Temipale

Hiki tatau e ngaahi laine ʻi he foʻi tapafaá ke fakaʻosi ʻa e vaeua ʻe taha ʻo e Temipale Calgary Alberta.

Te tau lava ʻo fakahoko ʻi he temipalé ha ngaahi fuakava, pe palōmesi mo e Tamai Hēvaní. Ko e hā ʻokú ke hanganaki fiefia atu ki ai ʻi ha ʻaho fekauʻaki mo e ʻalu ki he temipalé?

Tā fakatātaaʻi ʻe Melissa Manwill