Pasikalá mo e Ngaahi Palōmesí
“Mami, ʻoku ou tui naʻe tō ʻa e kiʻi tamasiʻi ko ʻeé mei heʻene pasikalá!” Ko ʻEni ange ia. Naʻe tangutu ha kiʻi tamasiʻi ʻi he saitiuoká ʻi muʻa atu. Naʻe lī ʻene pasikalá ʻi lalo pea naʻá ne tangi. Naʻe tangutu fakataha mo ia ha tamasiʻi lahi ange.
“ʻOkú ke lavea?” Ko e fehuʻi ange ia ʻa ʻEni ʻi heʻene ofi atu mo ʻene fineʻeikí.
Naʻe pehē ange ʻe he tamasiʻi lahi angé, “Naʻe tō hoku kiʻi tokouá ʻo lavea hono tuí. ʻOku fie maʻu ke u ʻave ia ki ʻapi. Ka ʻoku ʻikai ke u tui te u lava ʻo taki fakatouʻosi ʻa e ongo pasikalá mo tokoniʻi ia ke lue ʻi he taimi tatau.
“Te ma lava ʻo tokoni atu!” Ko ʻEni ange ia.
Naʻe kamo atu e Fineʻeikí. “Te ma lava ʻo tokoni atu ke mo aʻu ki ʻapi.”
Naʻe holoholoʻi ʻe he kiʻi tamasiʻi siʻisiʻí hono loʻimatá. Naʻe tokoniʻi ia ʻe hono tokoua lahí ke tuʻu ki ʻolunga. Naʻe taki ʻe he fineʻeikí mo ʻEni ʻa e pasikalá. Naʻa nau lue māmālie atu ʻi he halá.
Ne ʻikai fuoloa kuo nau aʻu ki he ʻapi ʻo e ongo tamaikí. Naʻe hū mai ha fefine ki tuʻa ʻokú ne teke vakavaka. Naʻá ne fehuʻi ange, “Ko e hā e meʻa ʻoku hokó?”
Naʻe pehē ange ʻe he fineʻeikí, “Naʻe tō ho fohá mei heʻene pasikalá ʻo lavea hono tuí. Ne ma fakatokangaʻi atu ia. Peá ma afe atu ʻo tokoni.”
Naʻe sio e fefiné kiate kinaua. Ka naʻe ʻikai ke ne lea ʻaki ha meʻa. Naʻá ne taki atu e nima ʻo e kiʻi tamasiʻí. “Hū mai. Te u fufulu ho tuí. Seisoni, fakahū e pasikalá ki he fale tauʻanga meʻalelé.”
Naʻe taki atu ʻe he tamasiʻi lahí ʻa e pasikalá. Naʻe tāpuniʻi ʻe he fefiné ʻa e matapā ʻi muʻá.
Naʻe kamata lue leva e fineʻeikí mo ʻEni ki ʻapi.
Naʻe fakafulofula pē ʻa ʻEni. “Naʻe ʻikai ke nau fakamālō mai kinautolu!”
Naʻe tali ange ʻe he fineʻeikí, “ʻIkai, naʻe ʻikai.” Ka ʻoku tau tokoniʻi nai e kakaí koeʻuhí ke nau fakamālō mai?”
Naʻe fakakaukau ʻa ʻEni ki ai ʻi ha kiʻi taimi siʻi. “ʻIkai. ʻOku tau tokoniʻi kinautolu koeʻuhí ʻoku nau fie maʻu ʻetau tokoní. ʻI he taimi naʻá ku papitaiso aí, naʻá ku palōmesi te u tokoni ki he kakai kehé.”
Naʻe pehē ange ‘e he fineʻeikí, “ʻOkú ke moʻoni. Ko e meʻa ia ʻoku tau palōmesi kotoa ki aí.”
Naʻe toe kiʻi fakakaukau lahi ange ʻa ʻEni. “Naʻe ʻikai ke fakamālō maʻu pē ʻa e kakaí kia Sīsū ʻi he ngaahi meʻa lelei naʻá Ne fakahokó. Ka naʻe ʻikai tuku ai ʻEne tokoní. Ko ia he ʻikai ke u tuku ia ke ne taʻofi au.”
Naʻe pehē ange ʻe he fineʻeikí, “Pea manatuʻi ʻoku fiefia ʻa e Tamai Hēvaní ʻi he taimi ʻoku tau tokoni aí.”
Ne malimali ʻa ʻEni. “Kuo feʻunga pē ia kiate au.”
Tā fakatātā ʻa Mark Robison