Tohi ʻe Koe
Ngaahi Taumuʻa ki he Papitaisó
ʻI Nōvema 2019, ne u fanongo ai mo hoku fāmilí ki he polokalama Face to Face ʻa ʻEletā Gong fekauʻaki mo e polokalama ʻa e Fānaú mo e Toʻu Tupú. Hili iá, naʻe ʻomi ʻe heʻeku pīsopé ha kiʻi tohi tufa ke tokoni ki hono ngāueʻi ʻemau ngaahi taumuʻá.
Ko ʻeku ʻuluaki taumuʻá ke fakaʻosi hono lau e Tohi ʻa Molomoná kimuʻa ʻi hoku taʻu valú ke teuteu ki hoku papitaisó. Naʻá ku ʻosi kamata lau ia ka naʻe ʻikai ke u fuʻu vēkeveke ki ai. Ka ʻi he ʻaho ko iá ne u fokotuʻu ha palani mo ʻeku tangataʻeikí. Ne ma vakaiʻi e lahi ʻo e ngaahi vahe kuo pau ke u lau ʻi he ʻaho takitaha ke ʻosi ʻa e Tohi ʻa Molomoná kimuʻa peá u papitaisó. Ne u kamata lau ʻi he ʻaho kotoa pē pea fakaʻilongaʻi e vahe takitaha ʻi he ʻosi ʻeku laú.
ʻI heʻeku laukongá, naʻá ku loto ke fakahoko ha ngaahi meʻa lelei lahi ange. Ko ia ne u kau ai ki he ʻaukai fakamāmani lahi naʻe fanongonongo ʻe Palesiteni Nalesoni ke tokoni ki hono taʻotaʻofi ʻo e COVID-19. Naʻá ku fiefia ʻi heʻeku lava ʻo fakahoko ha ʻaukai kakató. Naʻe poupouʻi au ʻe heʻeku ongomātuʻá ke u lotu foki mo ʻaukai ke maʻu haʻaku fakamoʻoni ki he Tohi ʻa Molomoná pea mo e papitaisó.
Naʻá ku lotu mo ʻaukai ʻi he ʻuluaki Sāpate ʻo Meé. Ne ʻikai fuoloa mei ai, kuó u ʻosi lau kotoa e Tohi ʻa Molomoná. Ne u fiefia ʻi hoku papitaisó—ʻi hoku ʻaho fāʻeleʻí. Naʻá ku ongoʻi mateuteu ke fakahoko ʻa e fuakava ko ʻení mo e ʻOtuá! ʻOku ou ʻilo ʻoku moʻoni e Tohi ʻa Molomoná. Naʻá ku saiʻia ʻi hono lau iá, pea ʻoku ou fiefia ne u aʻusia e taumuʻa ko ʻení ʻi he tokoni ʻa hoku fāmilí.
Ngaahi tā fakatātā ʻa Rosalie Ledezma