ʻOku Lava ʻe Timi ʻo Fakahoko Ha Ngaahi Meʻa Faingataʻa
Ko ha tokotaha lue lōloa fuoloa ʻa Timi. Ka naʻe ngali fuʻu lōloa e fononga lalo ko ʻení. Naʻá ne lue lalo mo hono fāmilí ʻo aʻu ki ha anovai. Naʻe saiʻia ʻa Timi ʻi he sio ki he fanga kiʻi ika ʻi he vaí. Naʻá ne saiʻia ʻi he tolo maka ki he anovaí. Ka ko ʻeni kuo helaʻia mo fiekaia ia. Ne faingata‘a ʻa e fononga lalo lōloá!
Naʻá ne kole ange ki heʻene tangataʻeikí, “Te ke lava nai ʻo fua au?”
Naʻe pehē ange ʻe heʻene tangataʻeikí, “Kātaki. Kuo pau ke u fua ʻe au ho kiʻi tehiná.”
Naʻe kamata ke tangi ʻa Timi. Naʻá ne mātuʻaki helaʻia ʻaupito. Naʻe ʻikai toe fie lue ia.
Naʻá ne fehuʻi ange ki he Fineʻeikí, “Te ke lava ʻo fua au?”
Naʻe pehē ange ʻe he Fineʻeikí, “Kuo pau ke u fua ʻe au ʻa pēpē Mia. Ka te u lava ʻo puke ho nimá. Peá ta lue fakataha.”
Naʻe puke ʻe he Fineʻeikí e nima ʻo Timí. “Te ke lava pē, Timi. Te tau lava ʻo fakahoko e ngaahi meʻa ʻoku faingataʻá.”
ʻI he taimi naʻe helaʻia ai ʻa Timí, naʻe tuhu ʻa e Fineʻeikí ki he ngaahi matalaʻiʻakau lanu kehekehé. Ne nau tuʻu ʻo inu ha vai.
Hili iá pea toe hoko atu ʻenau fononga laló. Naʻe talaange ʻe he Fineʻeikí kia Timi, “Te tau lava ʻo fakahoko e ngaahi meʻa ʻoku faingataʻá, ʻokú ke fakahoko ha ngāue lelei ʻaupito.”
Ne ʻikai fuoloa kuo lava ʻa Timi ʻo sio ki he kaá. “Sio atu! Kuo tau mei aʻu!”
ʻI heʻenau aʻu ki he kaá, naʻe fāʻofua e fineʻeikí kia Timi. Naʻá ne pehē ange, “Kuó ke lavaʻi ia! “Te ke lava moʻoni ʻo fakohoko e ngaahi meʻa faingataʻá.”
Naʻe malimali ʻa Timi. Naʻá ne ongoʻi fiefia ʻaupito. Naʻá ne fakakakato lelei e fononga lalo lōloá!
Kimui ange ʻi he uike ko iá, naʻe pau ke fakahoko ʻe Timi ha meʻa faingataʻa ʻe taha. Naʻá ne ako ke heka pasikala. Naʻe pau ke ne toutou akoako. Naʻe aʻu ʻo tō mei he pasikalá.
Naʻe ʻeke ange ʻe heʻene tangataʻeikí. “ʻOkú ke kei fie feinga pē?”
Naʻe fakakaukau ʻa Timi ki he fononga lalo lōloá. Naʻe faingataʻa mo ia. Ka naʻá ne lavaʻi ia.
Naʻe talaange ʻe Timi, “ʻIo! Te u lava ʻo fakahoko e ngaahi meʻa faingataʻá!”
Naʻe toe heka ʻa Timi ki heʻene pasikalá. Naʻá ne loto ke toe feinga pē!
Ngaahi tā fakatātā ʻa Rachael mo Philippa Corcutt