Ngaahi ʻEkitivitī ʻi he Haʻu, ʻo Muimui ʻIate Aú
Ki he efiafi fakafāmili ʻi ʻapí, ako folofolá, pe fakafiefia pē!
Ngoto pe Tētē?
Ki he Sēnesi 6–11; Mōsese 8
Talanoá: Naʻe folofola ʻa e ʻOtuá ki he palōfita ko Noá ke foʻu ha vaka lahi naʻe ui ko ha ʻaʻake. ʻI he taimi naʻe lōmaki lahi aí, naʻe nofo pē ʻa Noa, hono fāmilí, mo e fanga monumanú ʻi he ʻaʻaké lolotonga ʻene tētē ʻi he fukahi vaí, pea naʻa nau hao. ʻI he ʻaho ní, te tau lava ʻo malu ʻi heʻetau muimui ki he palōfitá.
Hiva: Veesi tolu ʻo e “Muimui He Palōfitá” (Tohi Hiva ʻa e Fānaú, 58)
ʻEkitivitií: Fakafonu ha poulu ʻaki ha vai. Taufetongi ʻi hono faʻo ha ʻū lauʻiʻakau, makamaka, mo ha ngaahi meʻa kehe pē ʻoku ʻikai lava ʻo hū ki loto ʻa e vaí. ʻOku nau tētē nai pe ngoto? Ko e taimi pē ʻoku tētē ai ha meʻa, lea ʻaki ha meʻa te ke lava ʻo fakahoko ke muimui ki he palōfitá.
Ngaahi Ungaʻanga Māʻoniʻoní
Ki he Sēnesi 12–17; ʻĒpalahame 1–2
Talanoá: Naʻe fakahā ʻe he ʻOtuá ki he palōfita ko ʻĒpalahamé, “ʻOua naʻá ke manavahē … ko ho ungaʻangá au” (Sēnesi 15:1).. Naʻá Ne fakahā kia ʻĒpalahame te Ne tokoniʻi mo maluʻi ia.
Hiva: “Te u Moʻui ʻAki e Kosipelí” (Tohi Hiva ʻa e Fānaú, 72)
ʻEkitivitī: Tā pe ngaohi ha ungaʻanga/pā. Hiki ʻi hoʻo paá ʻa e ngaahi founga te ke lava ai ʻo talangofua ki he ʻOtuá.
Tokotaha Tauhi ʻo e Ngaahi Fekaú
Ki he Sēnesi 18–23
Talanoá: ʻOku ʻomi ʻe he Tamai Hēvaní ʻa e ngaahi fekaú ke tokoniʻi mo maluʻi kitautolu. Naʻe fakahā ʻe ha kau ʻāngelo ki ha tangata ko Lote ke mavahe mei hono ʻapí ʻi ha kolo faiangahala. Naʻe malu ʻa Lote koeʻuhí ko ʻene fakafanongo mo talangofuá.
Hiva: “Tauhi ʻa e Ngaahi Fekaú” (Tohi Hiva ʻa e Fānaú, 68)
ʻEkitivitī: Fai ha kiʻi vaʻinga he Taimí ni! Taufetongi ʻi he hoko ko e takí. ʻE talaange ʻe he takí ki he niʻihi kehé ke nau fakahoko ha ngaahi ngāue, hangē ko e “puna ki ʻolunga mo lalo” pe “lele takai ʻi ha siakale.” ʻE muimui e toengá ʻiate kinautolu. ʻE tokoniʻi fēfē nai koe ʻe he muimui ki he ngaahi fekaú?
Angaʻofa ki he Kāmeli ʻe Hongofulú
Ki he Sēnesi 24–27
Talanoá: Naʻe tokoni ʻa Lepeka ki he tamaioʻeiki ʻa ʻĒpalahamé ʻaki ʻene ʻomi ha vai maʻa ʻene fanga kāmeli ʻe toko 10 (vakai, Sēnesi 24:10–20). Naʻe houngaʻia e tamaioʻeiki ʻa ʻĒpalahamé ʻi heʻene angaʻofá.
Hiva: “ʻOku ou Feinga ke Hangē ko Sīsuú” (Tohi Hiva ʻa e Fānaú, 40)
ʻEkitivitií: Te ke lava ʻo tokoni hangē ko Lepeká! Tā ha kāmeli ʻe 10 (vakai, peesi 12, ke ako e foungá). Tautau kinautolu ʻi ha feituʻu ʻe lava ke sio ki ai ho fāmilí. Ko e taimi kotoa pē ʻokú ke fakahoko ai ha ngāue ʻofa ki ha taha kehe, valivali ha kāmeli ʻe taha.
Ngaahi tā fakatātā ʻa Katy Dockrill