Ko e Tokoní mo e Laumālie Māʻoniʻoní
Te ke lava ʻo ongoʻi ʻa e Laumālie Māʻoniʻoní kimuʻa peá ke papitaisó.
Naʻe lue fakataha ʻa Mateo mo ʻene tangataʻeikí ki he fakatauʻanga fuaʻiʻakau honau fāmilí. Naʻe muimui atu e kulī ʻa Mateo ko Seisí.
Naʻe fehuʻi ange ʻe Mateo “Naʻá ke talanoa ki he pīsopé fekauʻaki mo hoku papitaisó?” Naʻá ne ʻosi taʻu valu, ka naʻe teʻeki papitaiso ia koeʻuhí ko e mahaki fakaʻauhá.
Naʻe talaange ʻe heʻene tangataʻeikí, “Naʻá ne talamai he ʻikai lava ho papitaisó he māhiná ni.” Mahalo pē ʻi he māhina katuʻú.”
“SAI.” Naʻe fakafulofula ʻa Mateo. Naʻá ne mātuʻaki fie maʻu ke papitaiso ia mo ma‘u e me‘afoaki ʻo e Laumālie Mā‘oniʻoní. Ka naʻe hangē he ʻikai toe hoko iá!
Naʻe fakaava ʻe he tangataʻeikí e fakatauʻanga fuaʻiʻakaú. Naʻe tokoni ʻa Mateo ki hono fetuku hake ʻo e ʻū puha molí, lēmaní, mangó, mo e siainé. Naʻá ne tokoni leva ke fokotuʻutuʻu kinautolu ʻi he ʻū funga laupapá.
Naʻe kei fakakaukau pē ʻa Mateo ki he Laumālie Māʻoniʻoní lolotonga ʻena ngāué. Naʻá ne fehuʻi ange, “ʻOku ongo fēfē ʻa e Laumālie Māʻoniʻoní?”
Naʻe tala ange ʻe he tangataʻeikí, “ʻOku fakafiemālieʻi au ʻe he Laumālie Māʻoniʻoní ʻi he taimi ʻoku ou loto mamahi aí. Pea ʻokú Ne ʻai ke u ongoʻi fiefia ʻi he taimi ʻoku ou tokoni ai ki ha tahá.”
“ʻOku ʻikai ke u faʻa tatali ke papitaiso au ke u lava foki mo au ʻo ongoʻi ʻa e Laumālie Māʻoniʻoní!”
Naʻe talaange ʻe he tangataʻeikí, “Naʻa mo e kimuʻa pea papitaiso mo hilifakinima koé, te ke kei lava pē ʻo ongoʻi ʻa e Laumālie Māʻoniʻoní. Te ke lava ʻo ongoʻi ʻEne fakafiemālié he taimí ni. Hangē ko e taimi ʻokú ke lotu pe fai ai ha meʻa ʻi he angaʻofa maʻá ha tahá. Pea hili hono hilifakinima koé, te ke maʻu maʻu pē ʻa e Laumālie Māʻoniʻoní.”
Naʻe kiʻi fakakaukau ki ai ʻa Mateo. Kuó ne ongoʻi nai e Laumālie Māʻoniʻoní kimuʻa?
Ne ʻikai fuoloa kuó na ʻosi fokotuʻutuʻu kotoa e ʻū puhá. Naʻe fehuʻi ange ʻe he tangataʻeikí. “Kuó ke maau ke tokoni ki he ongomātuʻa Sōsaá?”
Naʻe kamo ange ʻa Mateo. Naʻe faingataʻa ʻa e lué ki he ongomātuʻa Sōsaá. Ko ia naʻe ʻalu leva ʻa Mateo ki he māketí koeʻuhí ko kinaua. Naʻá ne faʻa tokoni foki he taimi ʻe niʻihi ke fakahoko ha fanga kiʻi ngāue fakaʻapi.
Naʻe lue ʻa Mateo mo Seisi ki he ʻapi ʻo e ongo Sōsaá. Naʻe taʻataʻalo ange ʻa Mrs. Sōsā mei he fakafaletolo ʻi muʻá. “Mālō e lelei ki he pongipongí ni!
ʻOku ʻi ai haʻamo fakatau ke fai mai he ʻahó ni?” Ko Mateo ange ia.
“ʻIo. ʻOku ou fie maʻu ha mā, pateta, mo e pulu.” Naʻe lau ange ʻe Mrs. Sōsā ha ngaahi koini. “ʻOku totonu ke feʻunga pē ʻena.”
Naʻe toʻo ʻe Mateo ʻa e paʻangá. Naʻá ne fakatokangaʻi atu ha milemila veve ʻi he matapaá. Naʻá ne fehuʻi ange, “ʻE lava nai ke u ʻave ki tuʻa hoʻo milemila vevé?”
“ʻIo. Mālō!” Ko Mrs. Sōsā ange ia.
Hili hono ʻave ʻe Mateo e vevé ki tuʻá, naʻá ne ʻalu leva ʻo fakatau mai e meʻakaí. Naʻá ne fakakaukau ki he ngaahi meʻa kotoa kuó ne fakahoko he pongipongi ko iá. Naʻá ne tokoni ki heʻene tangataʻeikí ʻi he fakatauʻanga fuaʻiʻakaú. Naʻá ne tokoni ki he ongomātuʻa Sōsaá ke fakatau mai ha meʻakai. Pea naʻá ne maʻu ha ongo fakafiefia. Naʻá ne ongoʻi e Laumālie Māʻoniʻoní, ʻo hangē pē ko hono talaange ʻe heʻene tangataʻeikí!
Naʻe fakaʻamu ʻa Mateo he ʻikai ke toe fuoloa ange ʻene tatali ke papitaisó. Naʻá ne fie maʻu ke ʻiate ia maʻu pē ʻa e Laumālie Māʻoniʻoní!
Ngaahi tā fakatātā ʻa Carolina Farías