Kaumeʻa ki he Kaumeʻa
Fakatomala ʻi he ʻEleveitá
ʻI hoku taʻu 11, naʻe nofo hoku fāmilí ʻi ha fale fungavaka 12 ʻi Hongo Kongo. Naʻá ku lele ʻi he ʻaho kotoa pē ʻi he tuku ʻa e akó ki he falé ʻo heka ʻi he ʻeleveita ki homau fale nofoʻangá.
ʻI ha ʻaho ʻe taha ne u hū ai ki he ʻeleveitá ʻo lomi kotoa e ngaahi foʻi meʻa lomí ke nau ulo. ʻE tuʻu leva e ʻeleveitá ʻi he fungavaka takitaha. Naʻe kamata ke tāpuni e matapaá, ka naʻe fakafokifā kuo hū mai ha nima ʻo fakaava e matapaá. Ko e taha ia hoku ngaahi kaungāʻapí ʻi ʻolunga. Ne ʻikai ke ne lea mai fekauʻaki mo e ngaahi meʻa lomí, ka naʻá ku manavasiʻi. Hangē naʻe mātuʻaki fuʻu fuoloa ke u aʻu ki ʻapí!
Naʻe faifai pē pea tuʻu e ʻeleveitá ʻi he fungavaka hokó, ʻo tatali, pea toe hoko atu pē. ʻI he ava hake pē ʻa e matapaá ki homau fungavaká, ne u hū fakavave ki tuʻa. Ne u aʻu ki ʻapi kuó u tautaʻa koeʻuhí ne u lele vave ʻaupito!
Hili pē ha taimi siʻi mei heʻeku aʻu ki ʻapí, kuo tatangi e telefoní. Ko e kaungāʻapi ia mei he ʻeleveitá. Naʻá ku fuʻu manavasiʻi ʻi he tatali ki heʻeku faʻeé ke tāpuniʻi e telefoní.
Hili ʻene tāpuniʻi e telefoní, naʻe ʻeke mai ʻe heʻeku faʻeé, “Naʻá ke lomiʻi kotoa e ʻū meʻa lomi ʻi he ʻeleveitá?”
Naʻe ʻikai ke u lava ʻo loi ki heʻeku faʻeé. Peá u pehē ange, “ʻIo.”
Naʻe mamali ʻeku faʻeé. “Sai, tau ʻalu leva ki ʻolunga ʻo talanoa ki hotau kaungāʻapí.”
Ne ma ʻalu fakataha leva ki ʻolunga. Ne u lomiʻi e fafangu matapaá, pea fakaava ʻe hoku kaungāʻapí e matapaá. Naʻe punou hoku ʻulú ʻi heʻeku kole fakamolemole ʻi heʻeku lomi kotoa e ʻū meʻa lomí. Naʻá ku palōmesi ange he ʻikai ke u toe fakahoko ia.
Naʻe angalelei homau kaungāʻapí. Naʻá ne pehē mai, “ʻOku ou tui ʻoku sai pē ia, kehe pē ke ʻoua te ke toe fakahoko ia.”
Hili ʻeku kole fakamolemole ange ki aí, ne u ongoʻi fiefia. Pea naʻe ʻikai ke u toe lomi kotoa e ʻū meʻa lomi ʻi he ʻeleveitá.
Naʻe tokoniʻi au ʻe he aʻusia ko ʻení ke u ako fekauʻaki mo e fakatomalá. Ne u ʻiloʻi naʻá ku fakahoko ha meʻa hala. Naʻá ku ongoʻi fakatomala peá u kole fakamolemole. Pea naʻe ʻikai ke u toe fakahoko ia. Naʻá ku ongoʻi fiefia leva. ʻE lava foki ke ʻomi ʻe he fakatomalá ha fiefia kiate koe.
Tā fakatātā ʻa Alyssa Tallent