Solo ʻa Selá
Naʻe lelei e meʻa kotoa … kae ʻoua kuo aʻu ʻa Sela ki he taú.
Naʻe fehuʻi ange ʻe Ms. Katinā, ko e faiako ki he leʻo ʻo Selá, “Sela, te ke fie hiva ʻi ha polokalama?”
“Te u saiʻia ai!” Ko Sela ange ia.
Naʻe pehē ange ʻe Ms. Katinā ʻi heʻene tohi ʻi heʻene kiʻi pepá, “ʻE lelei ke ke hiva ʻi muʻa ʻi he niʻihi kehé.” ʻOku fakahoko e polokalamá ʻi he fakaʻosinga ʻo ʻAokosí, ko ia te ke maʻu e faʻahitaʻu māfaná kotoa ke ke teuteu ai.”
Naʻe talanoa ange ʻe Sela ki heʻene ongomātuʻá ʻa e polokalamá ʻi heʻene aʻu pē ki ʻapí. Naʻá ne fetuʻutaki telefoni ki heʻene ongo kuí ʻi he ʻosi pē ʻa e maʻu meʻatokoni efiafí. Naʻá ne fuʻu fiefia ʻaupito!
ʻI heʻene lēsoni hokó, naʻe fili ʻe Sela mo Ms. Katinā ha foʻi hiva ʻe ua ki he polokalamá. Ko e foʻi hiva ʻe taha mei ha faiva hiva, pea taha mei ha tulama hiva. Pea kamata ngāue leva ʻa Sela.
Naʻá ne akoako ʻene ongo hivá mo Ms. Katinā. Pea naʻá ne akoako ʻi ʻapi ʻi he ʻaho kotoa pē. Naʻe ʻikai fuoloa kuó ne maʻuloto ʻene ongo foʻi hivá. Ka naʻe hokohoko atu pē ʻene akoakó.
Ne faifai pea aʻu ki he ʻaho ʻo e polokalamá. Naʻe teuteu ʻa Sela. Naʻá ne tui hono kofu lanu puluú. Naʻá ne helu hono ʻulú. Naʻá ne tūʻulutui leva ʻi hono veʻe mohengá ʻo kole e tokoni ʻa e Tamai Hēvaní.
Ne ʻikai fuoloa kuo nau fononga atu ki he polokalamá. Naʻe fehuʻi ange ʻe heʻene faʻeé, “ʻOkú ke ilifia?”
Naʻe kalokalo ange ʻa Sela. “Kuó u maʻuloto lelei e ongo foʻi hivá, te u lava pē ʻe au ʻo hivaʻi fakaholomui!”
Naʻe malimali e fine‘eikí. “Kuó ke ngāue lahi moʻoni ki ai ʻi he faʻahitaʻu māfana ko ʻení.”
ʻI heʻenau aʻu ki he polokalamá, naʻe tangutu ʻa Sela ʻi he tafaʻaki ʻo ʻene ongomātuʻá mo e ongo kuí. Naʻe fuofua hiva hono kaungāmeʻa ko Meiní. Naʻe hoko atu ʻa ʻĒveni. Naʻe pasipasi ʻa Sela mo e toenga ʻo e haʻofangá ʻi he ʻosi ʻa e foʻi hiva takitaha.
ʻI he hokosia e taimi ʻo Selá, naʻe mihiʻi ʻene mānavá peá ne lue ki he maiká. Naʻá ne hivaʻi lelei ʻa e ʻuluaki foʻi hivá. Naʻe malimali ange ʻa Ms. Katinā kiate ia. Naʻe kamata hiva leva ʻe Sela ʻa e foʻi hiva hono uá.
Naʻe lelei e meʻa kotoa kae ʻoua kuó ne aʻu ki he taú. Pea naʻe hoko leva ai. Naʻe ngalo ʻiate ia e leá! Naʻe ʻikai pē toe lava ke ne fakakaukau ki ha meʻa. Naʻá ne vakai manavasiʻi atu ki he haʻofangá peá ne kamo atu ki he tokotaha tā pianó ke taʻofi.
Naʻe pehē ange ʻe Sela, “Fakamolemole. ʻOku ou fie kamata foʻou.”
Naʻe kiʻi pupuhaʻia hono ongo nimá. Naʻe lava ke ne ongoʻi e tā vave hono mafú. Naʻá ne toe mihiʻi lahi ʻene mānavá, kamo ki he tokotaha tā pianó, pea toe kamata leva.
ʻI he taimi ko ʻení, naʻá ne manatuʻi e ngaahi leá kotoa. Naʻe pasipasi e haʻofangá ʻi heʻene ʻosí. Naʻe malimali ʻa Sela, ka naʻá ne mā.
Hili e polokalamá, naʻe maʻu ʻe Sela ʻene faiakó.
Naʻá ne pehē ange, “Kātaki, Ms. Katinā. Naʻe ʻikai lelei ʻeku polokalamá.”
Naʻe talaange ʻe heʻene faiakó, “ʻIkai, Sela. Naʻe ngalo pē hoʻo hivá. ʻE lava ke hoko ia ki ha taha pē. Ko e meʻa mahuʻingá hoʻo toe hoko atu peé.”
Naʻe pehē ange ʻe heʻene kuifefiné, “ʻOku moʻoni ia. ʻOku mau laukau ʻaki koe.”
ʻI he pō ko iá, naʻe fakakaukau ʻa Sela ki he polokalamá. Naʻá ne kei ongoʻi taʻe-fiemālie pē ʻi heʻene fehalaākí. Ka naʻe moʻoni ʻa Ms. Katinā. Naʻekei hoko atu pē ʻa Sela. ʻE lava ke ne laukau ʻaki ia.
Naʻá ne fakakaukau, ʻoku hangē ia ko e fakatomalá.
“ʻEi, Fineʻeiki!” Ko e ui ia ʻa Sela mo ʻene lele ki he loki mohe ʻo ʻene ongomātuʻá. “Kuó u ʻiloʻi ʻoku hangē ʻa e polokalamá ko e moʻuí.”
“ʻO fēfē ia, ʻofaʻanga?” Ko e fehuʻi ange ia ʻa e Fineʻeikí. Naʻe tokoto atu ʻa Sela ʻi he funga mohengá ʻi he tafaʻaki ʻo ʻene Fineʻeikí.
“Naʻá ku fakahoko ha fehalaaki ʻi heʻeku soló, ka naʻá ku fakaleleiʻi ia peá u hoko atu. ʻI heʻeku fakahoko ha fili hala ʻi he moʻuí, te u lava ʻo fakaleleiʻi ia ʻaki haʻaku fakatomala. Te u lava leva ʻo hoko atu ʻo toe lelei ange.”
Naʻe pehē ange ʻe he Fineʻeikí, “ʻOkú ke ʻilo, ko ha kaveinga lelei ia ki he efiafi fakafāmilí. Te ke fie fai e lēsoní?”
“Te u lava lelei!” Ko Sela ange ia. Naʻe ʻikai ke ne faʻa tatali ke vahevahe e meʻa naʻá ne akó.
Tā fakatātaaʻi ʻe Alyssa Tallent