O Uila ma Folafolaga
“Tina, ou te manatu na pa’ū lena tamaitiiti mai lana uila!” O le tala lea a Angie. Sa nofo se tamaitiiti i luga o le auala savali i luma atu. O lana uila sa i luga o le eleele, ma sa tagi o ia. Sa nofo se tamaitiiti matua faatasi ma ia.
“O e lavea?” Sa fesili atu ai Annie a o la latalata atu ma Tina.
“Sa pa’ū lo‘u uso ma leaga ai lona tulivae,” o le tala lea a le tamaitiiti matua. “E tatau ona ou aveina o ia i le fale. Ae ou te manatu e le mafai ona ou tuleia uma uila ma fesoasoani ia te ia e savali i le taimi lava e tasi.”
“E mafai ona ma fesoasoani atu!” O le tala lea a Annie.
Sa lue le ulu o Tina. “E mafai ona ma fesoasoani ia oulua ia taunuu atu i le fale.”
Sa soloiese e le tamaitiiti laitiiti ona loimata. Sa fesoasoani lona uso e faatu o ia i luga. Sa ave e Tina ma Annie uila. Sa latou savavali lemu atu i lalo o le auala.
E le’i umi ae latou i ai i le fale o tama. Sa la’a mai i fafo se fafine ma ona lima i luga o ona puimanava. “O le a le mea ua tupu?” o lana fesili lea.
“Sa pa’ū lou atalii mai lana uila ma lavea ai lona tulivae,” o le tala lea a Tina. “Sa matou pasi ane. O lea na ma tutu ai e fesoasoani.”
Sa tilotilo atu le fafine ia i la’ua. Ae e le’i faia mai sana tala. Sa ia uuina le lima o le tamaitiiti. “Sau i totonu. O le a ou fufuluina lou tulivae. Jason, tuu uila i totonu o le fale taavale.”
Sa toso ese e le tamaitiiti matua ia uila. Sa tapuni e le fafine le faitotoa pito i luma.
Sa amata ona savavali atu Tina ma Annie i le fale.
Na faa’ū’ū Annie. “Latou te le’i faafetai mai ia i ta’ua!”
“Leai, latou te le’i faia,” o le tala lea a Tina. “Ae pe o tatou fesoasoani ea i tagata ina ia latou faafetai mai ia i tatou?”
Sa mafaufau Annie mo se minute. “Leai. Tatou te fesoasoani ia i latou aua latou te manaomia la tatou fesoasoani. Ina ua ou papatiso, sa ou folafola atu e fesoasoani i isi tagata.”
“Sa’o lelei,” na fai mai ai Tina. “O le mea lena tatou te folafola uma atu.”
Sa toe mafaufau atili Annie. “Sa le’i faafetai i taimi uma tagata ia Iesu mo mea lelei sa Ia faia. Ae sa le’i taofia ai o Ia e lena mea. O lea o le a ou le faatagaina ai foi lea mea e taofia ai a’u.”
“Ma manatua e fiafia le Tama Faalelagi pe a tatou fesoasoani foi,” o le tala lea a Tina.
Sa ataata Annie. “Ua lava lena faafetai mo a’u.”
Ata na tusia e Mark Robison