Pese Toatasi a Sara
Sa lelei mea uma … seia oo ina taunuu Sara i le tali.
“Sara, e te fia pese i se polokalama?” na fesili atu ai Ms. Gardner, le faiaoga o leo a Sara.
“Ou te fiafia lava i ai!” O le tala lea a Sara.
“O le a lelei mo oe le pese i luma o isi,” o le tala lea a Ms. Gardner, ma tusi i lana api. “O le polokalama o loo i le faaiuga o Aokuso, o lea o le a e maua ai le taumafanafana atoa e saunia ai.”
Sa ta’u atu e Sara i ona matua e uiga i le polokalama i le taimi lava na taunuu ai i le fale. Sa ia valaau atu i ona matua matutua i le taimi lava na uma ai le taumafataga o le afiafi. Sa matuai fiafia lava o ia!
I le lesona na sosoo ai, sa piki ai e Sara ma Ms. Gardner ni pese se lua mo le polokalama. O le tasi pese e mai se opera, ae o le isi e mai se tala faamusika. Ona galue lea o Sara.
Sa ia faataitaia ana pese ma Ms. Gardner. Ma sa ia faataitai i le fale i aso uma. E le’i umi ae taulotoina ana pese. Ae, sa ia galue pea.
Na iu ina oo mai le aso o le polokalama. Ua sauni Sara. Sa ia ofuina lona ofu lanumoana. Sa ia seluina lona lauulu. Ona ia tootuli lea i autafa o lona moega ma ole atu mo le fesoasoani a le Tama Faalelagi.
E le’i umi ae latou agai atu i le polokalama. “O e fefe?” o le fesili lea a lona tina.
Na lūlū lona ulu. “Ou te iloa lelei lava pese, e mafai ona ou usuina e amata mai tua!”
Na ataata Tina. “Sa e faataitai malosi i lenei taumafanafana.”
Ina ua latou taunuu i le polokalama, sa nofo Sara i autafa o ona matua ma matua matutua. O lana uo o Megan o le tagata muamua na pese. Sa sosoo ai ma le pese a Evan. Sa patipati Sara ma isi tagata uma o le aofia ina ua uma pese taitasi.
Ina ua oo i le taimi o Sara, sa ia manava loloa ma savali atu i le faaleotele leo. Sa ia usuina atoatoa le pese muamua. Sa ataata atu Ms. Gardner ia te ia. Ona amata lea e Sara le pese lona lua.
Sa lelei mea uma seia oo ina taunuu i le tali. Ona tupu ai lea. Sa galo ia te ia ia upu! Sa matuai le manatua lava se mea. Sa ia tilotilo atu ma le popole i le aofia ma talo atu i le ta piano e taofi.
“Ou te faamalie atu,” o le tala lea a Sara. “Ou te manao e toe amata.”
Sa fai si afu o ona lima. Sa mafai ona ia lagonaina le tata o lona fatu i lona fatafata. Sa toe manava loloa o ia, luelue atu lona ulu i le ta piano, ma toe amata.
O le taimi lea, sa ia manatua ai upu uma. Sa patipati le aofia ina ua mae’a. Sa ataata Sara, ae sa maasiasi o ia.
Ina ua mae’a le polokalama, sa maua e Sara lona faiaoga.
“Ou te faamalie atu, Ms. Gardner,” o lana tala lea. “Sa matuai faaletonu lava a’u.”
“E leai lava, Sara,” o le tala lea a lona faiaoga. “Ua galo ia te oe. E mafai ona tupu lena mea i soo se tasi. O le mea taua sa e faaauau pea.”
“E sa’o lena,” na fai atu ai Tinamatua, ao faatasi atu ia i laua. “Matou te mitamita tele ia te oe.”
I lena po, sa mafaufau ai Sara i le polokalama. Sa ia lagona pea le le fiafia e uiga i le faaletonu. Ae sa sa‘o Ms. Gardner. Sa faaauau pea Sara. E mafai ona mitamita o ia i lena mea.
E pei lava o le salamo, sa ia mafaufau ai.
“Ei, Tina!” Na valaau atu ai Sara, ma tamoe atu i le potumoe o ona matua. “Sa ou iloaina o le polokalama e pei lava o le olaga.”
“I le a le itu, la’u pele?” O le fesili lea a Tina. Na ia pe’a atu i luga o le moega i talaane o Tina.
“Sa ou faia se mea sese i la‘u pese, ae sa ou faaleleia ma agai pea i luma. I le olaga, pe a ou faia se filifiliga sese, e mafai ona ou faaleleia e ala i le salamo. Ona mafai lea ona ou agai i luma ma faia ia sili atu.”
“E te iloa, e foliga mai o se autu maoae lena mo le afiafi faaleaiga,” o le tala lea a Tina. “E te manao e tuuina atu le lesona?”
“Ioe!” O le tala lea a Sara. Sa le mafai ona faatali o ia e faasoa atu mea sa ia aoaoina.
Ata na tusia e Alyssa Tallent