O Paionia i Atunuu Uma
O le Faatali mo le Tolu Tausaga a Carol
Sa moomoo Carol ia mafai ona papatisoina o ia.
Ding-dong! Sa tatagi le logo o le faitotoa. Sa taufetuli atu Carol ma lona uso o Jacqui i le faitotoa. “Tina!” Sa valaau atu ai Carol. “O Dee lea ua ii. O le a matou o i le lotu!”
“Manuia lua Aso,” o le tala lea a Tina.
Sa tatala e Carol le faitotoa. “Talofa, Dee” sa ia fai atu ai. “Tatou o!”
Sa savavali atu Carol, Jacqui, ma Dee i le fale faatali pasi. Sa latou fiafia lava e asiasi i se ekalesia fou. Sa latou faitau i ai i se mekasini. Sa latou valaaulia nisi o uo latou te o mai faatasi foi ma i latou.
Sa tu mai le pasi lanu mumu. Sa feosofi i luga teineiti. I Lonetona, sa tietie pasi ai Carol ma ana uo toeitiiti lava i soo se mea latou te o i ai.
A o tu le pasi i le ala, sa toatele isi uo na o mai. Vanessa, Sheila, ma Angela—sa latou o mai uma!
Sa tu le pasi i luma o se nofoaga autu o le alalafaga. O iina na faia ai sauniga a le ekalesia. Ina ua savali atu Carol i faitotoa, sa ia lagonaina se mea faapitoa.
Sa faalogologo Carol i pese, o tatalo, ma lauga. Sa alu muamua o ia i isi lotu. Ae sa ese lagona o lenei ekalesia.
Ina ua uma le lotu, sa tietie atu teineiti i le pasi i le fale. “E te toe fia alu i le vaiaso a sau?” O le fesili lea a Dee.
Sa ataata Carol. “O le mea lena sa ou mafaufau i ai!”
Sa o pea lava teineiti i le lotu. Sa lelei tele tagata iina. E masani lava ona fai atu se tasi ia i latou e nonofo i o latou tafatafa. Ma a i ai ni gaoioiga i le aluga o le vaiaso, sa valaaulia i latou i taimi uma. Sa lagona e Carol e pei o ia o se vaega o se aiga tele o le ekalesia.
Ina ua feiloai Carol i faifeautalai, ua uma ona ia manao e papatiso. Faapena foi Jacqui. Ae na fai mai matua o Carol e leai. Latou te le’i manatu ua lava le matutua o teineiti e filifili ai e papatiso.
O le toatele o uo a Carol sa le’i faatagaina foi ona papatisoina. Ae o Aso Sa taitasi, latou te o uma ai i le pasi i le lotu. Sa faanoanoa Carol e alu e aunoa ma le isi vaega o lona aiga. Ae sa ia iloaina e taua le alu.
Na mavae le tolu tausaga. Sa moomoo pea Carol ina ia mafai ona papatisoina o ia. Sa manao o ia e sau i fafo mai le vai, i le mamā ma le amiotonu. Ma sa ia iloa o le meaalofa o le Agaga Paia o le a fesoasoani tele ia te ia!
“Tina,” o le tala lea a Carol i se tasi aso, “e mafai ona ou papatiso?”
Sa filemu Tina mo se minute. “Ua ou vaai ua e sui talu ona e alu i le lotu,” o lana tala lea. “Ua ou vaai i lou taumafai malosi e fai ni filifiliga lelei i aso taitasi. Afai e fai mai lou tama ioe, e faapena foi a’u.”
Mulimuli ane sa mafai e Carol ma Jacqui ona papatiso. Ina ua tuu e faifeautalai o latou lima i luga o le ulu o Carol e faamau ai o ia, sa ia lagonaina le mama ma le malosi. Sa fiafia o ia sa ia faia ni folafolaga ma le Atua. Ma sa faamauina o se tagata o Le Ekalesia a Iesu Keriso o le Au Paia o Aso e Gata Ai!
Sa fusi e Carol ia Jacqui a o la’ua faatalitali mo le pasi e alu i le fale. O i la’ua o uluai tagata o le Ekalesia i o la’ua aiga. Na avea i la’ua ma ni paionia! Ma o se faamanuiaga lena o le a le tuulafoaiina lava e Carol.
O Egelani o se atunuu i Europa i sisifo. O se vaega o le Malo Aufaatasi.
E lua malumalu o Egelani.
E silia ma le 8,500 pasi i Lonetona, le laumua o Egelani.
Sa 11 tausaga o Carol i le taimi muamua na alu ai o ia i le lotu.
Sa papatisoina foi Dee mulimuli ane. O le asō o Carol ma Dee o ni uo lelei lava!
O loo auauna atu nei Carol o se sui auai o le aufono faufautua aoao a Tamaitai Talavou.
Ata na tusia e Katie Payne