Fesoasoani ma leAgaga Paia
E mafai ona e lagonaina le Agaga Paia a o le’i papatisoina oe.
Sa savavali faatasi atu Mateo ma lona tama i le latou maketi o fualaau aina suamalie. O le taifau a Mateo, o Zeus, na mulimuli atu ia i la’ua.
“Na e fesili i le epikopo e uiga i lo‘u papatisoga?” Na fesili atu ai Mateo. Ua valu ona tausaga, ae e le’i papatisoina o ia ona o le faama’i oti.
“Sa ia fai mai o le a le mafai ona e papatiso i lenei masina,” o le tala lea a Tama. “Atonu o le masina fou.”
“Ua lelei.” Sa faa’u’ū Mateo. Sa ia manao lava ia papatiso ma maua le meaalofa o le Agaga Paia. Ae sa foliga mai o le a le tupu lava!
Sa tatala e Tama le maketi. Sa fesoasoani Mateo e sii pusa moli, tipolo, mago, ma fa’i. Ona ia fesoasoani lea e tuu i luga o fata.
Sa mafaufau pea Mateo e uiga i le Agaga Paia a o la galulue. “O le a se lagona o le Agaga Paia?” na ia fesili ai.
“E faamafanafanaina a’u e le Agaga Paia pe a ou faanoanoa,” o le tala lea a Tama. “Ma Na te faia ia ou maua se lagona lelei pe a ou fesoasoani i se tasi.”
“E le mafai ona ou faatali e papatiso ina ia mafai foi ona ou lagonaina le Agaga Paia!”
“E oo lava ae e te le’i papatiso ma faamauina, e mafai ona e lagonaina le Agaga Paia,” o le tala lea a Tama. “E mafai ona e lagonaina Lona faamafanafanaga i le taimi nei. E pei o le taimi e te tatalo ai pe faia se mea agalelei mo se tasi. A uma loa ona faamauina oe, e mafai ona e maua pea le Agaga Paia e faatasi ma oe.”
Sa mafaufau Mateo i lena mea. Pe na ia lagonaina muamua le Agaga Paia?
E le’i umi ae la utaina uma i luga pusa. “Ua e sauni e fesoasoani i le au Sosa?” O le fesili lea a Tama.
Sa lue atu le ulu o Mateo. Sa faigata ia Mr. ma Mrs. Sosa ona la savavali. O lea na alu ai Mateo i le maketi mo i la’ua. O nisi taimi sa ia fesoasoani ai ia i la’ua e fai foi feau.
Sa savavali atu Mateo ma Zeus i le fale o le au Sosa. Sa talotalo mai Mrs. Sosa mai le polotito i luma. “Talofa lava!”
“E te manaomia se faatauga meaai i le asō?” Na fesili atu ai Mateo.
“Ioe. Ou te manaomia le falaoa, pateta, ma le povi.” Sa faitauina e Mrs. Sosa ni tupe siliva. “Ua lava lena.”
Sa ave e Mateo le tupe. Sa ia vaaia se taga lapisi i tafatafa o le faitotoa. “E mafai ona ou ave i fafo lena mea mo oe?” na ia fesili ai.
“Ioe. Faafetai lava!” Sa fai atu ai Mrs. Sosa.
Ina ua uma ona ia aveina le lapisi, sa faatau e Mateo meaai. Sa ia mafaufau i mea uma na ia faia i lena taeao. Sa ia fesoasoani ia Tama i le maketi o fualaau aina suamalie. Sa fesoasoani o ia i le au Sosa e faatau meaai. Ma sa ia maua se lagona lelei i totonu. Sa ia lagonaina le Agaga Paia, e pei lava ona fai mai Tama!
Sa faamoemoe Mateo o le a ia le toe faatalitali mo se taimi umi e papatiso ai. Sa manao o ia ia faatasi le Agaga Paia ma ia i taimi uma!
Ata na tusia e Carolina Farías