O le Tamā o Danilo
E mafai faapefea e lona tamā ona le amanaiaina a latou upu agaleaga?
Sa faatopetope atu Danilo i le faletele o le aoga. I ona luma atu, sa faagaogao ai e lona tamā se paelo lapisi. Sa faamoemoe Danilo o le a le vaai lona tamā ia te ia. Sa tuutuu ifo i lalo lona ulu, ma taumafai e faafefiloi ma isi tamaiti aoga. Sa ia lagonaina le maasiasi ona o lona tama o le tagata e tapenaina le aoga.
“Talofa, atalii,” o le tala lea a lona tama a o pasi atu Danilo.
Sa savali saoasaoa Danilo, ma faafoliga e le lagona. Ae ua uma ona matauina e isi tamaiti.
“Ei, Danilo,” sa valaau atu ai se tamaitiiti. “O lou tama lale, le salufale a le aoga! Atonu na te manaomia lau fesoasoani.”
“Aua le agaleaga ia Danilo,” o le tala lea a se isi tamaitiiti. “E mafai e Mr. Santos ona faia le tele o mea nai lo le na’o le salu. Vaai, e mafai foi ona ia faagaogao le lapisi!”
Sa toē uma tama.
Sa le mafai ona faatali Danilo e alu i le aoga tulagalua i le tausaga a sau. Atonu o le a taofia le taufaalili i lena taimi. Sa tilotilo atu o ia i lona tau’au. Sa galue lona tama ma se ataata i ona foliga. E mafai faapefea ona ia le amanaiaina a latou upu agaleaga?
Sa tamoe Danilo i le faletele. Sa faia se potopotoga a le aoga e faasilasila atu ai le faiaoga o le tausaga. O ana uo mamae, o Nathaniel ma Frances, na faasaoina se nofoa mo ia.
“O ai e te manatu na filifilia e faiaoga?” O le fesili lea a Nathaniel.
“Ou te faamoemoe o Miss Ocampo,” o le tala lea a Frances.
“E lelei tele o ia,” o le tala lea a Nathaniel. “Ae ou te fiafia tele ia Mr. Torres. O ai e te fia manao e malo, Danilo?”
Sa mafaufau Danilo i ona faiaoga. “Ou te fiafia i o’u faiaoga uma. O le a faigata ona filifili na o se tasi.”
Na tu i luga le puleaoga. Ua amata le faapotopotoga!
“Ua oo i le taimi e faasilasila atu ai le faiaoga o le tausaga,” o le tala lea a le puleaoga. “O le tausaga lenei, e toatele a tatou faiaoga lelei. Ae i le iuga, sa fai si ese o le ma filifiliga.” Sa ia uuina i luga le faailoga. “O lo matou faiaoga o le tausaga o Mr. Santos, o le tatou tagata e tapenaina le faleaoga!”
Sa ou le talitonu i ai! O lona tama, le faiaoga o le tausaga? Ae e le o ia o se faiaoga!
Sa savali atu le tama o Danilo i luma o le potu. Sa patipati tagata uma ma faafiafia mo ia. Sa faatalofa atu iai le puleaoga. Ona ia fai mai lea, “O nisi o outou atonu e le manatu o Mr. Santos o se faiaoga. Ae na te aoaoina i tatou i aso uma e ala i lana faataitaiga. O taeao taitasi, e taunuu ai o ia i le aoga a o le’i taunuu atu se isi tagata. A tuua le aoga, e masani lava o ia o le tagata mulimuli e aluese. Soo se galuega e faamamaluina pe afai e te galue malosi ma galue ma le fiafia. O le mea lenei na aoao mai e Angelo Santos ia i tatou. O le mafuaaga lena ua avea ai Angelo Santos ma faiaoga o le tausaga.
Sa mafaufau Danilo i lona tama o loo faagaogaoina lapisi. Sa ia iloa le malosi o le galue a lona tama. Ma na te le’i faatagaina mea na fai atu ai isi e aafia ai o ia. Atonu e mafai ona ia fesoasoani ia Danilo e aoao pe faapefea ona faia lena mea.
Ina ua mae’a le faapotopotoga, sa tu i luga Danilo. “O atu pea e aunoa ma a’u,” na ia ta’u atu ai i ana uo.
Sa savali atu Danilo i luma o le faletele. Sa tutu tagata faataamilo i lona tama, ma faatalofa atu ia te ia ma popo lona tua. Sa faafetai atu i latou taitoatasi ia te ia mo lana faataitaiga. Sa faatalitali Danilo i le faatausiusiuga o le motu o tagata seia oo ina o ese uma tagata.
Sa tepa a’e i luga lona tama mai lana faailoga ma ataata.
“O ai na manatu e mafai?” na fesili atu ai lona tama. “O a‘u, o le tagata e tapenaina le faleaoga.”
“Ua ou mitamita lava ia oe, Tama.” Sa faanatinati atu Danilo i luma ma fusi lona tama. O lona tama. O le faiaoga o le tausaga.
Ata na tusia e Jimmy Holder