Uo i le Uo
Salamo i le Lifi
Ina ua 11 o‘u tausaga, sa nonofo lo’u aiga i se fale e 12-fogafale i Hong Kong. O aso uma lava pe a tuua le aoga, ou te tamoe atu ai i totonu o le fale ma tietie atu i le lifi i lo matou fale mautotogi.
I se tasi aso sa ou oso ai i totonu o le lifi ma oomi faamau uma ina ia faamumuina. O lea la o le a tu le lifi i fogafale taitasi. Sa amata ona tapuni faitotoa, ae na faafuasei lava ona togi mai i totonu se lima ma tatala le faitotoa. O se tasi o o‘u tuaoi i le falealuga. Sa leai sana tala e uiga i faamau, ae sa ou popole. Sa pei e faavavau le alu i le fale!
Na mautinoa lava, na tu le lifi i le isi foloa, faatalitali, ona faaauau ai lea. O le taimi lava na matala mai ai faitotoa i luga o lo‘u foloa, sa ou faatopetope atu loa. Sa ou taunuu i le fale ma le afu aua sa ou tamoe vave!
E le’i leva ona ou taunuu i le fale, ae tatagi loa le telefoni. O le tuaoi mai le lifi. Sa matuai ou popole lava a’o faatalitali mo lo‘u tina e alu ese mai le telefoni.
Ina ua uma ona talanoa i le telefoni, sa fesili lo‘u tina, “Na e oomia uma faamau i luga o le lifi?”
Sa le mafai ona ou pepelo i lo’u tina. “Ioe,” na ou fai atu ai.
Sa ataata lo‘u tina. “Ua lelei, tatou o i le fogafale i luga ma talanoa i lo tatou tuaoi.”
Sa ma o faatasi i le fogafale i luga. Sa ou oomiina le logo o le faitotoa, ma sa sau lo‘u tuaoi i le faitotoa. Sa punou maualalo lo’u ulu a’o ou faamalie atu mo lo’u oomiina o faamau uma. Sa ou folafola atu o le a ou le toe faia lava.
Sa agalelei lo ma’ua tuaoi. Sa ia fai mai, “Pau lava le mea a e le toe faia, ou te manatu o le a lelei lena mea.”
Ina ua uma ona ou ta‘u atu ia te ia ou te faamalie atu, sa ou maua se lagona lelei. Ma ou te le’i toe oomiina lava faamau uma i luga o le lifi.
O lenei aafiaga na fesoasoani ou te aoao ai e uiga i le salamo. Sa ou iloaina sa ou faia se mea sese. Sa ou lagona le salamo ma talosaga atu mo se faamagaloga. Ma ou te le’i toe faia lava. Ona ou lagonaina lea o le fiafia! O le salamo e mafai foi ona aumaia ia te oe le fiafia.
Ata na tusia e Alyssa Tallent