E Mafai E Tim Ona Faia Mea Faigata!
O Tim o se tagata savali sopo lelei. Ae o lenei savaliga sopo sa foliga mai sa umi tele. Sa ia sopo ma lona aiga i le ala atoa i se vaituloto. Sa fiafia Tim e vaai i le i’a laitiiti i totonu o le vai. Sa fiafia o ia e tau’ai maa i le vaituloto. Ae o lenei ua lelava ma fiaai o ia. Sa faigata le savaiga sopo!
“E mafai ona e siiina a’u?” na ia fesili atu ai ia Tama.
“Ou te faamalie atu,” o le tala lea a Tama. “E tatau ona ou siiina lou uso laitiiti.”
Na amata ona tagi Tim. Sa matuai lelavā lava o ia. Sa le’i toe manao o ia e savali.
“E mafai ona e siiina a’u?” na ia fesili atu ai ia Tina.
“E tatau ona ou siiina pepe Mia,” o le tala lea a Tina. “Ae e mafai ona ou uuina lou lima. O le a ta savavali faatasi.”
Sa uu e Tina le lima o Tim. “E mafai ona e faia, Tim. E mafai ona tatou faia ni mea faigata.”
Ina ua lelava Tim, sa tusi atu Tina i fugalaau felanulanuai. Sa latou tutu e inu ni vai.
Ona latou sopo teisi lea. “E mafai ona tatou faia ni mea faigata,” na fai atu ai Tina ia Tim. “O loo e faia se galuega lelei tele.”
E le’i umi ae ila atu e Tim le taavale. “Vaai! Toeitiiti a a tatou oo i o!”
Ina ua latou toe foi atu i le taavale, sa fusi e Tina ia Tim. “Ua e mafaia!” o lana tala lea. “E mafai ona e faia ni mea faigata.”
Sa ataata Tim. Sa ia lagona le mitamita tele. Sa ia savali sopo i le ala atoa!
Mulimuli ane i lena vaiaso, sa tatau ai ia Tim ona faia se isi mea faigata. Sa ia aoao foi e tietie i se uila vilivae. Sa tatau ona ia faataitai ma faataitai. Sa pa’u foi o ia mai le uila.
“E te fia taumafai pea?” O le fesili lea a Tama.
Sa mafaufau Tim i le savaliga sopo. Sa faigata tele. Ae na ia faia lava.
“Ioe!” o le tala lea a Tim. “E mafai ona ou faia mea faigata!”
Sa toe foi Tim i lana uila. Sa manao o ia e toe taumafai!
Ata na tusia e Rachael ma Philippa Corcutt