‘Au ma Taleni

Saunia e Alelie Coronel-Camitan

(E faavae i se tala moni)

O au sili ona lelei e galulue faatasi ma fesoasoani le tasi i le isi ia lelei atili.

“Tamoe, Jillian, tamoe!” Na alaga atu ai Tama. O le tama o Jillian o le faiaoga lea o lana au soka. Sa latou toleni malosi e sauni mo le taaloga siamupini. Sa vevela le la, ae sa tamoe pea Jillian.

Mulimuli ane sa ili mai e Tama le faaili. “Ua lelei, sei tatou malolo.”

Sa uu mai e Jillian lana faguvai ma saofai i luga o le nofoa umi faatasi ma tama. Sa na o ia le teine i le au, ae sa le afaina ia te ia. Sa latou galulue faatasi uma ma fesoasoani le tasi i le isi ia lelei atili. E ui ina sa lelava o ia ma afu, ae sa ia lagona le fiafia e taaalo ma lana au.

“Tama, na faapefea mai tatou i le asō?” sa ia fesili ai.

Sa ataata Tama. “Lelei tele! Ou te manatu ua saunia le au mo le taaloga.”

Sa toe ataata atu Jillian. O a latou galuega faigata uma sa matua aoga lava!

A o agai atu o ia i le fale mai le toleniga, sa vaai Jillian i lana uo o Mei. Sa la i ai i le vasega Peraimeri e tasi. Ae e lei sau Mei i le Peraimeri mo sina taimi.

Sa ataata Jillian ia Mei. “Talofa, Mei! Ua ou misia oe i le Peraimeri. O seki oe?”

Sa autilo ifo Mei i lalo i ona seevae. “E le manao lou tina e alu i le lotu.”

“Aisea?”

“Ou te le iloa.” Sa ea i luga le ulu o Mei. “Ia, e tatau ona ou alu.”

Sa talotalo atu Jillian ma tilotilo atu ia Mei o savali ese atu. E mafai faapefea ona ou fesoasoani ia Mei? sa ia manatunatu ai.

Ina ua taunuu Jillian i le fale, sa ia taina ni pese Peraimeri i lana ukulele. Ona ia valaaulia lea o ona tuagane e usu le pese. Sa latou pepese seia oo ina valaau atu Tina ia i latou mo le ‘aiga o le afiafi.

“O le a ou asiasi ia Sister Aurea taeao,” o le tala lea a Tina.

“O Sister Aurea o le tina o Mei, a ea?” O le fesili lea a Jillian. “E mafai ona ta o?” E lei toe sau Mei i le Peraimeri. Ma ina ua ou vaai ia te ia ananei, sa foliga faanoanoa o ia.”

“Ioe, e mafai ona e sau,” o le tala lea a Tina.

“O le a ou aumaia la’u ukulele! E mafai ona ou taina ni pese Peraimeri. Ou te matea ua ia misia le usuina o pese,“ o le tala lea a Jillian.

Ina ua la taunuu atu i le fale o Mei i le aso na sosoo ai, sa tuu atu e Jillian ia Mei se opo lapoa. A o talanoa o la tina, sa o atu teineiti i fafo. Sa taina e Jillian lana ukulele, ma sa piki e Mei ia pese. Sa fiafia i laua e talie ma pepese faatasi seia oo i le taimi e o ai Jillian.

“Sa manaia le vaai atu ia te oe,” o le tala lea a Jillian. “Ua matou misia oe i le Peraimeri.”

“Ioe, maimau pe ana mafai ona ou sau. Atonu o le a ou toe fesili atu i lo‘u tina.”

O le Aso Sa na sosoo ai, sa i ai Mei i le lotu. Sa nofo Jillian i ona tafatafa. “Ua ou fiafia lava ua mafai ona e sau,” o lana tala lea.

Sa ataata Mei. “Ma a’u foi.”

I ni nai aso mulimuli ane, sa iu lava ina oo i le taimi mo le taaloga soka tele. Sa fai atu Jillian i le au e fai se tatalo a o lei faia le taaloga. Ua oo i le taimi e taaalo ai. Sa tamoe Jillian i le vave na ia mafaia. Sa latou galulue ma lana ‘au e pue le polo ma sikoa. Sa manumalo lana au i le taaloga!

I lena po a o taoto o ia i le moega, sa mafaufau Jillian e uiga ia Mei ma lana au soka. Sa fiafia o ia e avea ma se vaega o se au, e pei lava ona sa fiafia o ia e avea ma se vaega o le Peraimeri. Sa latou fesoasoani uma i le tasi ma le isi. Sa fiafia Jillian e mafai ona ia fesoasoani i ana uo, pe o le lotu po o luga o le malae.