O Le Suega mose Galuega
O se mea sese lenei mea!
“O le a le ituaiga galuega e te mana’o e fai pe a e matua?” Sa fesili atu ai Mrs. Lu i le vasega.
Sa faigofie lena tali! Sa ou manao e avea ma saienitisi. Sa ou vaai faalemafaufau ia te au lava o ofuina se ofutalaloa suesue ma faia ni suesuega matagofie.
“O le asō o le a faia ai e outou taitoatasi se suega i luga o le komepiuta o le a ta‘u atu ai ia te oe po o a ni galuega e te ono fiafia ai i se aso,” o le tala lea a Mrs. Lu.
E lei leva ae ua ou i ai i le komepiuta, ma sue la‘u suega. Sa ou taliina fesili uma ma manavanava loloa a o ou oomiina le ki “faauma”.
Saienitisi! Tusiata! Tagata e alu i le vateatea! Sa ou mafaufau a o utaina taunuuga. O na galuega o le a ofoofogia.
Peitai sa le’i tau maia e taunuuga se tasi o na galuega. Sa ou tilotilo atu i le lisi. Sa foliga manaia le mamanuina o ata. Sa ou le mautinoa lelei e uiga i le fai falaoa. Po o se tagata e faia fuafuaga mo gaoioiga.
O le mea na sili ona faateia ai o le taunuuga pito i luga. Sa tau mai ia te au o le a sili ona ou fiafia i le avea ai … ma se faiteufugalaau.
E a?! O se tasi e faatulagaina fugalaau? Sa ou mafaufau ai. O se mea sese lenei mea!
Ae sa ou iloaina sa ou taliina ma le faamaoni ia fesili taitasi. Sa lagona le vevela o o‘u foliga. Ou te lei manao e vaai a‘u uo i a’u taunuuga, o lea sa ou faatopetope ai ona tapuni le komepiuta.
“Manaia!” o le tala lea a la‘u uo mamae, o Tanu. “O lo’u taunuuga pito i luga o le mamanuina o uepisaite!”
“Oka se manaia,” sa ou memumemu atu ai. “Ae e te manatu e sao lelei lenei suega e uiga i ta galuega e tatau ona i ai?”
“Ia, ua na o se suega,” o le tala lea a Tanu, ma faamimigi tauau. “O le a lau galuega pito i luga?”
Sa ou faamalo i le fefe. “Atonu e sese. Ae na tau mai ia te au e tatau ona avea a‘u ma se faiteufugalaau.
Na moni lava ou popolega sili sa i ai. Sa amata ona ata Tanu.
“Sa ou iloa e te manao e piki ni fugalaau mo se galuega! E te fiafia lava i mea uiga ese faapena,“ o le talasua mai lea a Tanu.
“E leai!” Sa ou ita. “Ou te le fiafia lava i fugalaau.”
Sa ataata Tanu ma toe faaliu atu i lana komepiuta. Sa amata ona tiga lou manava. Sa matuai o’u ma lava! Mata na sa’o ea le suega? Mata e sa’o Tanu?
O le savali atu i le fale mai le aoga, sa ou lagonaina pea le maasiasi e uiga i taunuuga o la’u suega. Sa ou mafaufau i mea uma ou te fiafia e fai, e pei o le faia o ata ma le taina o le piano. Sa matuai ese lava i latou mai mea sa fiafia i ai nisi o tama o la’u vasega.
Atonu ou te ese lava, sa ou mafaufau ai. Sa faatumulia ou mata i loimata a o ou savali atu i totonu.
“O le a le mea ua tupu, Sefo?” O le fesili lea a Tama. “Na i ai se mea na tupu i le aoga?”
Sa ou nofo i lalo ma faamatala atu ia te ia e uiga i le suega mo galuega ma sa ou lagona ai le ese lava mai le toatele o isi tamaiti.
“E te iloa, Sefo,” na ia fai mai ai, “Na tuuina atu e le Tama Faalelagi ia te oe au taleni. E alofa le Atua ia te oe ma e finagalo ia e atinaeina. Ma ou te alofa foi ia te oe! O le fiafia i mea eseese mai nai au uo e le faapea ua e ese ai lava.”
“E mo’i?” Sa ou fesili atu ai.
Na luelue le ulu o tama. “E tatau ona eseese uma i tatou. Ou te manao ia e alofa ia te oe i le tagata ua avea ai oe. Ma ia manatua, o le suega ua na o le tuuina atu ia te oe o nisi o manatu o mea e te ono manao e fai. E le faapea o le a mautinoa lava lou iu atu i se tasi o na galuega. E mafai ona e faia au lava filifiliga. Ae afai e i ai se aso e te filifili ai e avea ma se faiteufugalaau, ou te mautinoa o le a e lelei tele!”
“Faafetai, Tama.” Sa ou opoina mai o ia. Sa lei toe lagonaina se ma’i o lo’u manava.
O le aso na sosoo ai i le aoga, sa nofo ai Tanu i o‘u tafatafa i le malologa. “Ei, Sefo,” na ia fai mai ai. “Ou te faatoese atu sa ou ata atu ia te oe. Ou te manatu e te maoae i soo se galuega e te maua!”
“Faafetai, Tanu,” sa ou fai atu ai. “O ai e iloa—atonu o le a ou anaina se faleoloa fugalaau ma o le a e fausia le uepisaite o la‘u faleoloa!”
“Manaia le tonu,” o le tala lea a Tanu, ma ataata. “Atonu o le a avea foi a’u ma au tagata faatau muamua!”
Ata na tusia e Mark Robison