Feauauai mo le Lotu
“A e sau i le fale, ta‘u mai po o a pese na e usuina i le Peraimeri,” o le tala lea a Sieni.
“O le a ou faia!” o le tala lea a lona uso o Miriama a o fai ona seevae.
E le o tagata uma o le aiga o Sieni e mafai ona o i le lotu i Aso Sa uma. E toaono tagata i le aiga o Sieni. Ae sa na o le lua ni pepa faataga i le pasi sa lava tupe a Mama e faatau i vaiaso taitasi. O lea sa tatau ai ona latou feauaua‘i e tietie i le pasi i le lotu.
Sa moomoo Sieni ia mafai ona alu o ia i vaiaso taitasi. Sa fiafia o ia e aoao e uiga ia Iesu Keriso. Sa fiafia o ia e pese i le Peraimeri. Sa manao o ia e vaai i ana uo. O le mea sili lava, sa manao o ia e lagona le lagona mafanafana, ma le fiafia sa ia maua i taimi uma i le lotu. Ae o le asō sa tatau ai ona nofo o ia i le fale.
“Taimi o le ō” Sa fusi e Mama ia Sieni ma lona tuagane ma ona uso e faatofa ai.
Sa taumafai Sieni e ataata ao o ese atu Miriama ma Mama. Ae sa ia lagonaina se patu i lona faaī a o ia tilotilo atu ia i laua o savavali ese. Maimau pe ana o lo‘u taimi lea e alu ai, o le mafaufau lea a Sieni. Sa faigata i taimi uma le nofo i le fale.
“E te fia valivali?” Sa uu mai e le tuagane laitiiti o Sieni, o Marco, ni vali ma se pepa.
Sa lue atu le ulu o Sieni.
Mo nai itula na sosoo ai, sa faitau ai e Sieni tala ma valivali faatasi ma Marco ma o laua tuafafine/uso matutua. Sa malie, ae sa mafaufau pea Sieni i le lotu. Pe o latou aoaoina ni pese fou i le Peraimeri i le taimi nei? Po o le a le lesona i le asō?
Na iu loa ina faalogo atu Sieni o tatala mai le faitotoa i luma. Ua o mai Mama ma Miriama i le fale!
“Mama! Miriama!” Sa tamoe atu Sieni i le faitotoa ma fusi i laua.
Sa tuu i lalo e Mama lana ato. “Tatou talanoa e uiga i mea sa ma aoaoina i le lotu.”
Sa nonofo faatasi tagata uma i lalo. Sa aumai i fafo e Mama le tamai tusipese sa ia teuina i lana ato. Sa usuina e le aiga o Sieni le “E Mafai Ona Faavavau Aiga.” Sa ia iloaina upu uma.
Ona fesili atu lea o Sieni ia Miriama e uiga i le Peraimeri. Sa susue e Miriama lana Tusi a Mamona ma aumai i fafo se fasipepa ua gaugau. Sa ia tuu i luga e vaai i ai tagata uma. O se ata o Iesu sa latou valivaliina ma nisi o tamaiti.
“Sa matou valivaliina se ata ma usu le pese ‘O Loo Ou Taumafai e Avea e Pei o Iesu.’ Ona matou talanoa lea e uiga i le auala e mafai ai e Iesu ona fesoasoani i tagata uma.”
“Sa matou talanoa foi e uiga i lena mea i le Aualofa,” o le tala lea a Mama. “E mafai ona fesoasoani Iesu Keriso ia i tatou pe a tatou fefefe pe tuuatoatasi.” Sa aumai i fafo e Mama se fasipepa mai lana ato. “Na tuuinamai e le faiaoga i tagata uma lenei upusii mai le perofeta. ‘Ao e filifili e ola i le itu a le Alii, e le tuua lava na o oe.’”*
“E oo lava iinei i le fale!” Sa fai atu ai Sieni.
Sa ataata Mamá. “E oo lava i le fale. E mafai ona tatou lagonaina i taimi uma le latalata mai o le Faaola ia i tatou.”
Sa ataata tele Sieni. E le tau alu fua o ia i le lotu i vaiaso taitasi. Ae sa mafai ona ia lagona le latalata atu ia Iesu i le fale. Ma sa fiafia o ia mo lona avanoa e alu ai i le lotu i se taimi vave lava.
Ata na tusia e Laura Catrinella