O Le Filifiliga o le Lakapi
Sa manao Samu e taalo lakapi, ae sa manao foi o ia e tausia le paia o le aso Sapati.
Sa tilotilo atu Samu i le lele o le polo mumu agai atu ia te ia. Sa ia pueina e pei lava ona sa ia faataitaia ma Tama. O lona aso muamua lea i toleniga lakapi ma o lona tausaga muamua foi ua taalo ai i se au mo‘i.
I le faaiuga o le toleniga, sa talotalo faatofa atu Samu i lana au taaalo.
“Toe feiloai i le vaiaso a sau!” sa fai mai ai se tasi o i latou.
Sa oso Samu i totonu o le taavale a Tina e alu i le fale.
“Faatoa ou iloaina o taaloga mo la‘u ‘au lakapi e faia i Aso Sa,” o le tala lea a Tina. “O le a sou manatu i le mea e tatau ona ta faia?”
Sa filemu Samu. Afai e alu o ia i le lotu i le Aso Sa, ona le mafai lea ona ia taalo lakapi ma lana au. Ae afai e alu o ia i ana taaloga, atonu e le mafai ona ia oo i le lotu. Sa manao o ia e fai uma mea e lua! “E mafai ona ta o i taaloga ia e fai a o lei amataina le lotu?” sa ia fesili atu ai.
“E tusa ma se itula ta te tietie atu ai i le lotu. Ma le isi, tatou te manaomia se taimi e saunia ai ae tatou te lei o, “o le tala lea a Tina.
Na iloa e Samu e sa’o lava tina. Sa i ai sona tuafafine laitiiti ma se tuagane pepe. E tele ina umi se taimi e sauni ai tagata uma mo le lotu.
“Ae o le mea aupito sili ona taua o lo tatou mananao lea e fai ni mea i le Aso Sa lea e faamanatu mai ai ia i tatou Iesu Keriso ma le Tama Faalelagi,” o le tala lea a Tina. Ina ua mavae se minute sa ia faaopoopo mai, “Atonu e mafai ona e alu i toleniga lakapi) i Aso Tofi ae alu i le lotu i Aso Sa.”
Na tilotilo atu Samu i fafo o le faamalama. Sa fiafia o ia e alu i le lotu ma aoao e uiga ia Iesu i Aso Sa. Sa ia iloa o se tasi o auala e avea ai e faapei o Iesu Keriso o le tausia lea o le paia o le aso Sapati. Ae o le a faanoanoa o ia i le misia o ana taaloga lakapi.
Sa le iloa e Samu po o le a le mea a fai. Ona oso ae lea o sona manatu.
“Ta tatalo e uiga i ai,” o le tala lea a Samu. “O le a ou faia se tatalo a o e aveina pea le taavale.” Sa piilima o ia ma moeiini ona mata. Sa fai si ese o le lagona o le tatalo i totonu o le taavale. Ae sa ia iloa e mafai ona ia tatalo i soo se mea. I lana tatalo, sa ia faamatala atu ai i le Tama Faalelagi le mea na tupu.
“Faamolemole fesoasoani mai ia te au e fai le filifiliga sa‘o,” o lana tala lea. Ina ua uma, sa ia fai atu amene. Sa fai atu foi Tina amene.
Sa i ai se faalogoga mafanafana o Samu i lona loto. Sa ia iloa le mea e tatau ona fai.
“O le a sou manatu?” O le fesili lea a Tina.
“Ou te fia alu i toleniga i Aso Tofi ma le lotu i Aso Sa.” Sa ataata Samu. “Ou te iloa e taua le faia ia faapitoa le Aso Sa.”
“E foliga mai o se fuafuaga sili lena,” o le tala lea a Tina.
O lena vaiaso, sa alu ai Samu i toleniga lakapi i le Aso Tofi. I le Aso Sa, sa alu o ia i le lotu. Sa ia aoao atili e uiga ia Iesu. Sa fiafia Samu e mafai ona alu i le lotu ma le lakapi, e tusa lava pe le mafai ona taalo i taaloga. Sa manaia le lagona o le tausia le aso Sapati ia paia.
Ata na tusia e Ruth Bennett