O Paionia i Atunuu Uma
O Toma ma le Fūlū Matautia
Sa iloa e Toma o le a fesoasoani le Atua ia i latou.
“Lea laia, Tamā (Tama),” na fai atu lemu ai Toma. Sa saofai lemu le tama o Toma i luga o lana fala moe. Sa fesoasoani Toma ia te ia e inu se suaniu felesi.
Sa mama‘i Tamā ma le vaega atoa o le aiga o Toma mo le tele o aso. Na toetoe o tagata uma i le nuu sa mama‘i foi. Na oo mai se faama‘i pipisi i le motu—o le fūlū Sipaniolo.
Sa savali i fafo Toma. O ia o se tasi sa na o ia lava sa malosi lelei e tausia isi. Ma e toatele aiga sa manaomia le fesoasoani.
Ou te manaomia ia tele le suaniu, sa mafaufau ai Toma. Sa a‘e o ia i luga o se niu umī. Ina ua taunuu o ia i le tumutumu, sa ia toliina ni niu ma togi mai i lalo i le eleele.
A o ia pe’a mai i lalo, sa mafaufau Toma e uiga i tagata o lona nuu. Sa faafefe tagata le vaaia o le toatele o i latou o mama‘i.
I se tausaga na muamua atu, sa ma’i ai le uso laitiiti o Toma, o Ailama. Sa faafefe tagata foi lena mea. Sa tatalo Toma ma lona aiga mo ia ina ia toe malosi.
Ona faia lea o se miti faapitoa a Tamā. O le miti na faaali atu ai ia te ia le auala e fesoasoani ai ia Ailama ia toe malosi atili—e ala i le tu‘iina o le pa‘u mai se laau o le gatae [wiliwili] e maua mai ai le sua. Sa fesoasoani Toma ia Tamā e tausia Ailama, ma sa laua avatu ia te ia le sua mai le laau. Ma sa faasolo ina toe malosi ai Ailama!
Sa iloa e Toma sa fesoasoani le Atua ia i latou i lena taimi. Ma sa ia iloa o le a fesoasoani mai le Atua ia i latou i le taimi nei.
Na taei e Toma niu. O le manogi matagofie o le suaniu na ia maua ai se lagona lelei teisi atu. Sa savali atu o ia i le fale na sosoo ai i le nuu e faasoa atu ni suaniu i ona tuaoi. Ona ia alu atu lea i le isi fale e sosoo ai. Ma le isi.
Na mavae atu vaiaso. O aso taitasi sa galue malosi ai Toma e tausi tagata uma. Sa ia pue ni moa ina ia mafai ona ia faia se supo mafanafana e faasoa atu. Sa ia aveina pakete vai mai le vaieli mo tagata e feinu ai.
O nisi o tagata o le nuu na maliliu. Na maliu foi Tamā. Sa matuai faigata lava ia Toma. Sa faanoanoa le nuu atoa. Ae o na mea uma, sa manatua ai e Toma e alofa le Atua ia te ia ma o le a fesoasoani ia te ia.
Sa lei taofia e Toma le fesoasoani atu i tagata. Ma ina ua mavae sina taimi, sa amata ona faasolo ina manuia tagata!
Na iu lava ina uma le faama‘i pipisi o le fūlū. Sa le toe mama‘i tagata. Sa mafai foi ona toe o Toma ma Ailama i le aoga. Sa misia e Toma ia Tamā i taimi uma. Ae sa ia iloaina e i ai se aso o le a ia toe vaai ai i lona tama. Ma sa ia iloa o le a i ai pea le Tama Faalelagi iina e fesoasoani ia te ia.
O Samoa o se vaega o motu i le Vasa Pasefika.
O le asō, e tasi le malumalu i Samoa.
O se fale faaleagaanuu i Samoa, e ta‘ua o se fale, e leai ni puipui.
Na oo atu le faama‘i pipisi o le fūlū Sipaniolo i Samoa i le 1918.
Sa 12 tausaga o Toma ina ua amata le faama‘i pipisi.
O le nuu o Toma, o Sauniatu, sa fausia e se vaega o le Au Paia o Aso e Gata Ai.
Ata na tusia e Corey Egbert