Faatumauina o le Saogalemu o Rufus
Sa ‘ai e Estelle lana u mulimuli o le enchiladas manaia a Mama ma faasaga ese atu lona nofoa mai le laulau o le polotito. O se po mafanafana o le taumafanafana—sa fetaui tonu lava mo le aai i fafo. Ma fetaui tonu mo le taalo! Sa le mafai ona faatali o ia e taalo togi ma toe aumai ma lana taifau, o Rufus.
Ae muamua sa tatau ona ia tapenaina le laulau. Sa ia faaputuina ipu mafolafola i se faaputuga umi. Sa ia iloa ua faasolo ina maluelue tele le faaputuga. Ae sa lei manao o ia e faafia ona alu atu ma toe sau i totonu.
Sa faapaleni e Estelle le faaputuga i le tasi lima ma tatala ma le faaeteete le faitotoa i le isi. Ae na amata ona sipa le faaputuga. Taei! E lua ipu mafolafola na nuti i luga o le fola, i luma tonu lava o le faitotoa. Sa tamoe atu Tama e vaai po o le a le mea na tupu ma alu e aumai se salu. Ona vaai atu lea o Estelle ia Rufus. Sa ia tamoe agai atu i le faitotoa.
“Rufus! Aua le laa i luga o ipu taei!” Sa tamoe faataamilo o ia i le laulau ma oso i ona luma. “Leai! Rufus, nofo!”
Ae sa lei tu Rufus. Sa ia taumafai e faataamilo ia te ia. Sa punou i lalo Estelle ma tuu ona lima i ona luma.
“Rufus, o loo ou taumafai ia e saogalemu,” o lana tala lea. “E maamaai fasi ipu. O le a lavea ai ou vae.”
Ona oso ae lea o se manatu ia Estelle. “O fea lau polo? E te fia taalo togi ma toe aumai?” Sa faliu atu Rufus e sue lana polo. O lea la ua saogalemuo o ia!
A o ia saluina ipu mafolafola taei ma Tama, sa mafaufau Estelle pe aisea na ia fai atu ai ia Rufus leai. Afai na laa o ia i luga o fasi ipu, semanu e lavea o ia. O le a le mafai ona ia faia le mea e fiafia o ia e fai—e pei o le taalo togi ma toe aumai.
E masani ona fai mai Tama e tuuina mai e le Tama Faalelagi poloaiga ina ia tatou fiafia ma saogalemu ai. Ae o nisi taimi sa manatu ai Estelle o poloaiga e pei lava o tulafono e taofia ai o ia mai le faia o le mea sa ia manao ai.
Sa tilotilo ifo Estelle i ipu taei. Atonu e fai mai le Tama Faalelagi leai i nisi o mea ona o loo Ia taumafai foi ia ou saogalemu, o ona mafaufauga ia.
Sa tamoe atu Rufus ia Estelle ma faapau le polo i ona vae. Sa ia valuina ona taliga. Ona ia togiina lea o le polo ma ata ao tamoe atu Rufus e tuli.
Sa saogalemu Rufus. Ma na fiafia o ia! Sa manao Estelle e mulimuli pea i poloaiga a le Tama Faalelagi ina ia tumau ai foi le fiafia ma le saogalemu.