Pāpa’ihia e ’outou

’Ohipa ha’uti i muri mai i te pāruru

Paisley B., 12 matahiti, Utaha, Marite

E mea ma’au roa tō’u teina, e’ita e pau te mau mea i roto i tōna ferurira’a, ’e e ha’ape’ape’a rahi nō vetahi ’ē. ’O ’oia te hō’ē o tō’u mau taupiri rahi roa a’e ’ia ha’uti ana’e au i ni’a i te tahua ha’utira’a. E mau hina’aro ta’a ’ē ato’a tōna. E mea na’ina’i roa ’oia nō tōna fāito matahiti ’e tē tāfifi ra ’oia nō te tai’ora’a, te pāpa’ira’a, te paraparaura’a ’e te hāro’aro’ara’a i te ta’ata i te tahi taime. E tari’a turi ato’a tōna.

I te hō’ē mahana, i tā mātou ha’api’ipi’ira’a, tē ta’uma ra vau i ni’a i te tahua ha’utira’a. ’Ua fa’aro’o vau i te hō’ē ta’ata i te paraura’a i te hō’ē parau au ’ore nō ni’a i te mau tamari’i huma. ’Ua ha’amata a’era rātou i te parau ha’uti ’e i te ’ata nō ni’a i te reira.

’Ua ’ite au ē, ’aita rātou i mana’o e ha’apēpē iā’u, ’ua ’oto roa rā vau ’e ’ua horo atu ra nō te ’imi i te hō’ē vāhi nō te tāpuni. ’A pārahi ai au i roto i tā’u vāhi tāpunira’a, ’ua pārahi mai te hō’ē ta’ata pa’ari i pīha’i iho iā’u ’e ’ua ha’amata i te paraparau mai iā’u nō ni’a i te ha’uti. ’Ua ha’amata vau i te huru maita’i a’e.

I te taime nō te ho’ira’a i te fare, ’ua parau vau i tō’u māmā i te ’ohipa i tupu. ’Ua parau mai ’oia ē, ’aita e fifi ’ia fa’aātea mai i te hō’ē mea ’o tē fa’atupu i te ’ino’ino i roto iā’u, ’e e mea maita’i ’ia paraparau i te hō’ē ta’ata pa’ari nō ni’a i tō’u mau mana’o.

I te tahi taime, ’aita te ta’ata e māramarama ra i te mana’o i roto i te ta’ata e hina’aro ta’a ’ē tōna, ’e ’aore rā i roto i te ta’ata tei mātau i te hō’ē ta’ata e hina’aro ta’a ’ē tōna. ’Ua hina’aro vau ’ia riro ’ei hi’ora’a nō te here ’e te hāmani maita’i.

Fa’ahōho’ara’a nā Kristin Sorra