Te fā au roa a’e
E hina’aro rahi tō David ’ia haere i te hiero nō Dubai ’ia tae i te hō’ē mahana.
’Ua fa’atē ’o David i te tahi tāpiri i ni’a i te hō’ē ’ōrapa-tihota. I muri iho, tu’u māite atu ra i te reira i tōna vāhi.
« ’Auē te au ē ! » Te parau a māmā. « ’Aita atu ai tā ’oe hiero tihota ».
« Māuruuru ! ». Pāhono atu ra David. « ’O te hiero nō Dubai. Tē tīa’i maoro nei au ’ia ti’a mai te hiero mau ».
’Ua ’oa’oa roa David mai te taime ’a fa’aara ai te peresideni Nelson i te hō’ē hiero ’āpī i te fenua i reira David i te orara’a. Tē vai ra i te Hau ari’i ’ārapia ’āmui te tahi o te mau fare teitei roa a’e i te ao nei. ’Aita rā e hiero—i teie taime. Teie ïa te hiero mātāmua i te mau fenua piri Hiti’a o te rā ato’a.
’Ua tāpiri ’o David i te ’ōrapa-tihota hope’a i ni’a i te hiero tāna i hāmani. « Terā ! » tāna i parau. « ’Ua oti roa ».
’Ua pi’o māmā i raro nō te hi’o māite. « Maita’i roa ! I hea tāua e tu’u ai i te reira ? »
’Ua feruri David. « ’E i roto i tō’u piha ? I pīha’i iho i tā’u mau pere’o’o auahi ». E mea au nā David te mau pere’o’o auahi. ’Ua hina’aro ’oia ’ia riro ei ’ī’ite nō te pere’o’o auahi i te hō’ē mahana.
« Mana’o maita’i roa », te parau ïa a māmā.
’Ua ta’ita’i māite atu ra ’o David i tāna hiero tihota i roto i tōna piha. ’Ua tu’u marū noa atu ra i pīha’i iho i tāna mau pere’o’o auahi iti. ’Ua tīa’i maoro noa atu ra nō te fa’a’ite i tōna mau tuahine ’e i tōna pāpā.
’Ia po’ipo’i a’e, haere mai nei ’o Ana, te pātea ’ino o David. ’Ua paraparau rāua nō ni’a i te mau mea tāna e tīa’i onoono nei. ’E mana’o a’era ’oia i te hō’ē mea.
« Hina’aro ’oe ’ia ’ite i te mea tā’u e ’oa’oa roa nei ? »Ui a’era David.
« ’Ē ! » Parau atu ra tāti Ana.
« Te ’ēkālesia tā mātou tō’u ’utuāfare e haere nei, tē patu ra i te hō’ē hiero i Dubai ! »
E ’ata mai nei tāti Ana. « E au ra e mea ta’a ’ē te reira ».
« Te reira iho ā ! ». Pāhono atu ra David. « I teie taime, ’aita e hiero tō tā mātou ’Ēkālesia i teie vāhi, nō reira tē haere nei mātou i te hiero i Helevetia ’aore rā i Heremani. Tē ’oa’oa nei au nō te hiero e patuhia fātata mai ia mātou. Tā’u fā te fa’aineinera’a ’ia haere i reira ».
« ’Auē ïa te ’oa’oa ē ! » Parau atu ra tāti Ana. « E aha tā ’oe e rave nō te fa’aineine ia ’oe ? »
Parau atu ra David : « Tē pure nei au ’e tē tai’o nei au i te mau pāpa’ira’a mo’a ». « ’E tē tāmata nei au i te pe’e ia Iesu Mesia. ’Ei reira vau e ineine ai nō te haere i te hiero ! »
« E mea fa’ahiahia mau », te parau ïa a tāti Ana. « ’Ua pāpū iā’u ē, e fa’aitoito maita’i ’oe nō te fa’atāpae i tā ’oe mau ’ōpuara’a ».
« ’Ē, e nā reira vau ! » ’Ua fāri’i ’o David ma te ’oa’oa. E mea au ’ia fa’a’ite i te hō’ē mea faufa’a roa nōna.
I taua pō ra, ’ua ani David e nehenehe ānei ’ōna e fa’anu’u i tāna hiero tihota ’ōrapa i roto i te fare tūtu.
« Tē hina’aro nei au e vaiiho te reira i te hō’ē vāhi e ’ite ai tātou i te mau taime ato’a. Tē hina’aro nei au e ha’amana’o ’ia tāmau noa i te fa’aineine nō te hiero ».
Parau atu ra pāpā, « E mana’o maita’i roa te reira ». « Tē mana’o nei au ē, te hi’ora’a i tā ’oe hiero i te mau mahana ato’a, e tauturu ato’a te reira iā’u ».
’Ua tauturu pāpā ia David ’ia fa’anu’u i te hiero tihota i roto i te fare tūtu.
« ’Aita atu ai », parau mai nei te tuahine o David, ’o Kaitlynn.
« ’Ia oti ana’e te hiero mau nō Dubai, e nehenehe ānei au e ani i tō’u mau hoa ’ia haere mai e māta’ita’i ? » Ui a’era David.
’Ua fāri’i māmā i tōna upo’o. « E mana’o maita’i roa te reira ! »
« E ’o tāti Ana ïa ? »
« Pāpū roa ïa », te parau ïa a pāpā.
’Ua ’ata’ata ’o David. ’Ua māuruuru a’ena ’oia nō te hiero nō Dubai !
Fa’ahoho’ara’a nā Mark Robison