Pionie i te mau fenua ato’a
Te mā’imira’a roa a Michael
’Ua uiui ’o Michael tei hea te ’ēkālesia mau.
’Ua tāhei Michael i tāna pūtē tua i ni’a i te ’arapo’a. ’O te mahana mātāmua ïa o te ha’api’ira’a, ’o tāna e tīa’i maoro noa nei ! Tē ora ra ’oia ’e tōna ’utuāfare i te fenua ’Īnītia. E rave rahi tamari’i i tōna ’oire e’ita e nehenehe e haere i te ha’api’ira’a. ’Ua māuruuru Michael i te fāna’ora’a ’ia ha’api’i mai i te mau mea.
’Ua au roa ’oia ’ia ha’api’i i te mau mea—te mau nūmera iho ā rā. E mea au ato’a nāna ’ia tai’o i te mau ve’a. ’Ua huri ’oia i te mau ’api ’ū rau. ’Ua tai’o ’oia nō ni’a i te mau ’ānimara ’e te mau vāhi rau ’ati a’e te ao nei.
I te hō’ē mahana ’ua tai’o ’o Michael i te hō’ē ve’a huru ta’a ’ē. Nō roto mai ïa i Te ’Ēkālesia a Iesu Mesia i te Feiā Mo’a i te mau Mahana Hope’a nei. E mea au nā Michael ’ia tai’o i te reira. ’Ua hina’aro ’oia e ha’api’i rahi atu ā.
’Ua haere ’o Michael i te tahi atu mau ’ēkālesia nā mua atu. E mea au nāna ’ia ’ite i te parau nō Iesu. I te tahi rā mau taime, e tupu mai te mana’o ta’a ’ore i roto iāna. Tei hea te ’ēkālesia mau ?
I muri a’e, ’ua tai’o ’oia i te hō’ē buka iti nō ni’a i te peropheta Iosepha Semita. ’Ua tupu te hō’ē mea ta’a ’ē i roto iāna ’a tai’o ai ’oia i te reira. ’Ua haere ato’a ’o Iosepha Semita i te mau ’ēkālesia e rave rahi nō te ’imi i te parau mau. Mai ia Iosepha paha vau, te mana’o ïa o Michael.
’Ua hina’aro Michael e haere i teie ’ēkālesia ’āpī nō te hi’o e aha te huru. ’Aita rā Te ’Ēkālesia a Iesu Mesia i te Feiā Mo’a i te mau Mahana Hope’a nei i te fenua ’Īnītia. ’Ua pe’ape’a ’o Michael. ’Ua tāmau noa ’oia i te ha’api’i i te mau mea ato’a e noa’a iāna. ’Ua tai’o ’oia i te Buka a Moromona ’e ’ua pure. ’Ua ’ite ’oia ē, e parau mau te reira ! ’Ua hina’aro ’oia e bāpetizo iāna. E tītauhia rā iāna ’ia tīa’i.
’Ua ma’iri te mau matahiti. I te 21ra’a o tōna matahiti, ’ua haere mai e piti nā misiōnare pa’ari i te fenua ’Īnītia. I te pae hope’a, ’ua bāpetizohia ’o Michael ! ’Aita i maoro ’ua tāvini ’oia i te hō’ē misioni i Utaha, i te Fenua Marite.
’Ua ma’iri e rave rahi matahiti. I te hō’ē mahana ’ua pi’i mai te hō’ē hoa iāna. Tē ’imi ra te ’Ēkālesia i te mau huri parau nō te tauturu i te ’āmuira’a rahi nō te mau ta’ata nō te fenua ’Īnītia. ’Ua mata’u Michael i te ha’amatara’a. ’Ua ’oa’oa rā ’oia i te tauturura’a.
I te hō’ē avatea nō te āva’e ’Ātopa, tē ’īriti ra Michael i te hō’ē a’ora’a a te peresideni Nelson i roto i te ’āmuira’a rahi. ’Ua fa’aro’o ’oia i te peropheta i te fa’aarara’a ē, e patuhia te hō’ē hiero i te fenua ’Īnītia ! ’Ua hina’aro Michael e tuō i tōna ’oa’oa. ’Ua ta’i ’oia ma te roimata ’oa’oa.
’Ua māuruuru Michael nō te mau mea ato’a tāna i ha’api’i mai i te fare ha’api’ira’a. Hau roa atu rā, ’ua mauruuru ’oia i te mea ē, ’ua ha’api’i mai ’oia nō ni’a i te ’evanelia a Iesu Mesia. ’Ua ’oa’oa ’oia ’ua rahi atu ā te ta’ata i tōna fenua tē nehenehe ato’a e ha’api’i mai nō ni’a ia Iesu Mesia !
E’ita e maoro roa, e ti’a mai te hō’ē hiero i ’Īnītia !
’Ua hau i te 20 reo mana i te fenua ’Īnītia.
E piti misiōni i ’Īnītia i teie mahana.
Te mā’a au roa a Michael, ’o te biryani ïa (e raiti ’e te ’ina’i tei tunuhia i te rā’au tehutehu).
Tāna ’ā’amu au roa i roto i te pāpa’ira’a mo’a, nō ni’a ïa ia Iosepha o te Faufa’a Tahito.
I teie mahana, tē tauturu nei Michael i te ’auvahara’a i te ’āmuira’a rahi nō te mau ta’ata nō ’Īnītia.
Fa’ahōho’ara’a nā Oriol Vidal