’Ā’amu nō roto mai i te mau pāpa’ira’a mo’a

Eliaha ’e te reo iti ha’iha’i

E peropheta Eliaha. ’Ua hina’aro ’oia e fa’aro’o i te reo o te Atua. ’Ua haere ’oia i ni’a i te hō’ē mou’a nō te fa’aro’o maita’i a’e i te reo o te Atua.

’Ua tupu a’era te hō’ē mata’i rahi. Nō te pūai o te reira, ’ua pararī te mau ’ōfa’i. E mea pūai te mata’i. E ’ere rā te reira i te reo o te Atua.

I muri iho’ ’ua tupu te hō’ē ’āueuera’a fenua. ’Ua ’āueue te fenua. Tē vai ato’a ra te hō’ē auahi. E auahi rahi. E ’ere rā te ’āueuera’a fenua ’e te auahi i te reo o te Atua.

I muri iho e mea māniania ’ore. ’Ua fa’aro’o Eliaha i te reo o te Atua. E mea iti ’e te ha’iha’i. E mea māramarama rā.

E nehenehe au e fa’aro’o i te reo o te Atua nā roto i te fa’aro’ora’a i te Vārua Maita’i. Tē paraparau mai nei ’oia iā’u nā roto i te mau rāve’a ha’iha’i ’e te ’ōhie.