Te hīmene au roa a’e a Fatima
’Ua ’ōu’au’a ’o Fatima i ni’a i te purūmu. Tē ho’i ra rāua māmā i te fare nā te fare ha’api’ira’a mai. ’Ua hīmenemene ’oia ma te ’ōu’au’a noa.
« ’Ua ani mai ’o Lopez vahine ia mātou ’ia ha’api’i mai i te hō’ē hīmene », te parau ïa a Fatima. « E nehenehe ānei ’oe e ha’api’i iā’u i te hō’ē hīmene ? »
’Ua ’ata’ata ’o māmā. « ’Ē ! »
I tō rāua taera’a i te fare, ’ua hīmene ’āmui ’o māmā ’e ’o Fatima i te mau hīmene. ’Ua hīmene rāua e rave rahi hīmene. ’Aita rā rāua i hīmene i tāna hīmene au roa a’e.
« E nehenehe ānei au e hīmene i te hō’ē hīmene Paraimere ? » Te uira’a ïa a Fatima.
« ’Ē », te parau ïa a māmā.
’Ua hīmene a’era ’o Fatima « E ti’a i te ’utuāfare ’ia ora tāhō’ē ». ’Ua tāmau ’oia i te mau parau ’e ’o māmā. I muri iho ’ua hīmene ’oia ’o ’oia ana’e iho. ’Ua hīmene noa ’oia ē tae roa atu ē, ’ua mau iāna te mau parau ato’a.
I te fare ha’api’ira’a, e hina’aro rahi tō Fatima ’ia fa’a’ite i tāna hīmene i tāna piha ha’api’ira’a.
« E hina’aro ānei te hō’ē tamari’i e fa’a’ite mai i tāna hīmene ? » Te parau ïa a Lopez vahine.
’Ua ’āfa’i ’o Fatima i tōna rima i ni’a. « Hina’aro vau ! »
’Ua ti’a a’era ’oia i ni’a ma te ’ata’ata. « E ’utuāfare tō’u i ni’a i te fenua nei. E mea maita’i roa rātou i ni’a iā’u », hīmene a’era ’oia.
’A hīmene ai ’o Fatima, ’ua ’oa’oa ’oia. ’E ’ua ha’amana’o ’oia i te tā’āto’ara’a o te hīmene ! ’Ua pōpō te mau pīahi ato’a nō tāna piha ha’api’ira’a.
I muri a’e i te ha’api’ira’a, ’ua haere mai māmā e ti’i ia Fatima. ’Ua paraparau ’o Lopez vahine ia māmā.
« ’Ua hīmene ’oia i te hō’ē hīmene nehenehe. ’E mai te huru ra ē, ’aita ’oia i ri’ari’a a’e ».
’Ua ’ata’ata ’o Fatima. ’Ua ’ata’ata ato’a ’o māmā.
« E hīmene mātou i te mau hīmene nehenehe i te mau hepetoma ato’a i te fare purera’a ! » Te parau ïa a Fatima.
« E nehenehe ’oe e haere mai nā muri iho ia māua i te mau huru taime ato’a », te parau ïa a māmā.
’Ua ’ata’ata ’o Lopez vahine. « Māuruuru ».
’Ua hīmene noa ’o Fatima ’a ho’i ai ’oia i te fare ’e ’o māmā. E mea au nāna ’ia fa’a’ite i te hō’ē hīmene i tāna piha ha’api’ira’a. ’Ua fa’a’oa’oa te hīmene iāna.
Fa’ahōho’ara’a nā Alessia Girasole