Fare ha’api’ira’a ’āpī, hoa ’āpī
Nāhea ’o Ada e nehenehe ai e fa’ahoa i te ta’ata ’aita ho’i tāna hō’ē a’e parau Tinito ?
Ri’ari’a vau », te parau ïa a Ada. ’O tāna ïa mahana mātāmua i te ha’api’ira’a i Taiwan. ’Aita rā ’oia e paraparau nei i te reo Tinito mai te tahi atu mau pīahi. Nāhea ’oia e nehenehe ai e fa’ahoa i te ta’ata ? ’O vai tāna e ha’uti atu i ’ia taime fa’afa’aeara’a ?
’Ua ’āpā maita’i ’o māmā iāna. « ’Aita e fifi te ri’ari’a. »
’Ua fa’atu’atu’a Ada te mata. « ’Aita vau i ’ite e nāhea i te fa’ahoa i’ō nei ».
’Ua ’āpa fa’ahou atu ra ’o māmā iāna. « Mai te mea e taiā ’oe, e nehenehe paha ïa tā ’oe e feruri i te hō’ē hīmene Paraimere. E tauturu te reira ? »
’Ua fāri’i ’o Ada. Haere atu ra ’oia ’e tōna māmā i roto i tāna piha ha’api’ira’a. Tē tīa’i noa ra tāna ’orometua ha’api’i iāna. « Ni Hao ! », ’ua parau te ’orometua ha’api’i. ’Ua tāmata Ada i te ’ata’ata. ’Aita ’oia i ’ite e aha te aura’a o taua mau parau ra.
’Ua ’āpā ’o Ada ia māmā, e reva atu ra māmā. I muri iho, ’ua ’itehia mai iāna te hō’ē ’iri ’ohipara’a ’e ’ua pārahi i raro.
’Ua hi’o ’oia i te tahi atu mau tamari’i. Tē paraparau ra te tahi pae o rātou te tahi ’e te tahi. ’Ua pārahi hau noa vetahi mai ia Ada ra. ’Ua mata’u ri’i ’o Ada. Mai te huru ra ē, tē mūmū ra te mau manu pātia i roto i tōna ’ōpū.
’E ’ua ’ite atu ra Ada i te hō’ē tamāhine tē ta’i ra. ’Ua hina’aro Ada e tauturu iāna. Nāhea rā ’oia e nehenehe ai e tauturu atu ’aita ho’i tāna hō’ē a’e parau Tinito ? Ē mai te mea ’aita te tamāhine e hina’aro i te tauturu ?
’Ua rave rā Ada i te mea tā māmā i parau. ’Ua feruri ’oia i te mau parau o tāna hīmene Paraimere au roa a’e : « ’A aroha te tahi i te tahi mai ia Iesu e here ia ’outou ». ’Ua ’ite Ada ē, tē ani ra te Vārua Maita’i iāna ’ia tauturu atu.
’Ua pārahi ’o Ada i pīha’i iho i te tamāhine. ’Ua tauahi atu ra ’oia iāna. I muri iho ’ua tāpe’a ’oia i tōna tua mai tā māmā i nā reira i te taime ’a ’oto ai ’o Ada. ’Ua fa’aea te tamāhine i te ta’i ! ’Ua tauahi ’oia ia Ada i muri.
’Ua fa’atoro atu ra ’o Ada i ni’a iāna iho. « Ada ».
’Ua fa’atoro mai ra te tamāhine i ni’a iāna iho. Nā ’ō atu ra ’oia, « Mei ».
’Ua ’ata’ata ’o Ada. ’Ua pārahi ’oia i pīha’i iho ia Mei i te toe’a o te mahana. Noa atu ē, ’aita rāua i paraparau i te hō’ē ā reo, ’ua ’ārearea ’āmui rāua. ’Ua ’amu ’āmui rāua i tā rāua mā’a. ’Ua ha’uti ’āmui rāua i te taime fa’aeara’a. ’E ’ua tauturu Mei ia Ada ’ia ha’api’i i te mau ta’o ’āpī nā roto i te reo Tinito !
E’ita ’o Ada e nehenehe e tīa’i nō te fa’a’ite ia māmā nō ni’a i tōna hoa ’āpī. ’Ua ’ite ’oia ē, mai te mea e pe’e ’oia ia Iesu, ’aita e faufa’a ’ia mata’u i te hō’ē mea.
Fa’ahōho’ara’a nā Shawna J. C. Tenney