Nō roto mai i te Peresidenira’a Mātāmua
Te māramarama ’e te hau o te hiero
Nā te peresideni Henry B.Eyring
Tauturu piti i roto i te Peresidenira’a Mātāmua
Tīpe’ehia mai roto mai i te a’ora’a « E mea au nā’u ’ia hi’o i te hiero », Liahona, Mē 2021, 28–31.
E nehenehe te ’itera’a i te hō’ē hiero ’e ’aore rā i te hōho’a nō te reira e fa’atupu i te hina’aro ’ia haere i roto ’ia tae i te hō’ē mahana. E tae mai te mahana e noa’a ai ia ’outou te hō’ē parau fa’ati’a nō te hiero nō te rave i te mau bāpetizora’a i roto i te hiero. ’Ia bāpetizo-ana’e-hia ’outou nō te hō’ē ta’ata tei pohe, tē tauturu ra ïa ’outou i te Fa’aora i roto i tāna ’ohipa mo’a nō te ha’amaita’ira’a i te hō’ē tamari’i a tō tātou Metua i te ao ra.
E rave rahi matahiti i ma’iri a’e nei, ’ua haere au ’e tā’u tamāhine i te hiero. ’O ’oia te hope’a tei bāpetizohia i taua mahana ra. ’Ua ani mai te hō’ē rave ’ohipa nō te hiero i tā’u tamāhine ē, e nehenehe ānei tāna e fa’aea maoro atu ā nō te bāpetizo i te mau ta’ata ato’a tei ineine te mau i’oa i taua mahana ra. ’Ua pāhono ’oia ē ’ē.
’Ua hi’o vau i tā’u tamāhine iti i te haerera’a i roto i te ’āpo’o bāpetizora’a. Ha’amata a’era te mau bāpetizora’a. ’Ua tahe mai te pape i ni’a i tōna hōho’a mata i te mau taime ato’a e haere mai ’oia i rāpae i te pape. ’Ua anihia ’oia fa’ahou ’e fa’ahou ā : « E nehenehe ānei ’o ’oe e haere fa’ahou ā ? » I te mau taime ato’a, ’ua parau ’oia ē ’ē, ma te reo pāpū. ’Ua fa’aea ’oia e tae roa i te i’oa hope’a i ni’a i te tāpura i terā mahana ’ia fāri’i i te ha’amaita’ira’a nō te bāpetizora’a nā roto i te i’oa o Iesu Mesia.
Tē ha’amana’o noa nei ā vau i te mana’o nō te māramarama ’e te hau ’a haere ai māua i rāpae i te hiero. E mea nā reira te tāvinira’a hiero i te fa’ateitei ’e i te taui ia tātou.
Māramarama o te hiero
’A tu’u i teie mau hōho’a i roto i tō ’outou fare nō te fa’aha’amana’o ia outou ē, e nehenehe ’outou e haere i roto i te hiero ’ia tae i te hō’ē mahana.
Fa’ahōho’araa nā David Habben