Te tata’ura’a fa’ahorora’a vahie
’Ua parau te peropheta ’eiaha roa atu tātou e fa’aea i te fa’aineine.
E mea pine te ’āvae o Luka i ni’a i te repo. ’Ua hi’o ’oia nā ni’a i tōna tapono. Te noa’ahia ra ’oia e tōna taea’e ’o Robert !
« Fē ! ’O ’oe te fē ! » Te parau ïa a Robert.
Tūpā’ata a’era ’o Luka. ’Ua a’ua’u ’oia i tōna tuahine pa’ari ’o Mili.
I muri a’e i te ha’uti, ’ua pārahi rātou i raro nō te fa’afa’aea.
« E aha tā tātou e nehenehe e ha’uti i teienei ? » Te uira’a ïa a Mili.
’Ua ’oa’oa ’o Luka i te mea ē, e taea’e ’e e tuahine tōna nō te ha’uti i pīha’i iho iāna. E rave rahi rā te mau mea tā te COVID-19 i taui. E’ita tā rātou e nehenehe e haere atu i te mau vāhi e rave rahi ta’ata. ’E i te tahi mau taime, ’aita roa atu rātou i fa’ati’ahia ’ia haere i rāpae.
’Ua tāmata ’o Luka i te feruri i te hō’ē ha’uti tā rātou e nehenehe e ha’uti. I muri iho, ’ua feruri ’oia i te hō’ē mea tāna i fa’aro’o i roto i te Paraimere.
’Ua parau ’o Luka : « ’Ia mana’o vau, e ti’a ia tātou ’ia rave i te hō’ē mea nō te fa’aineine ia tātou ».
« E aha ïa terā ? » Te uira’a ïa a Mili.
’Ua hi’o ’o Luka i te mau tumu tuava ’ati a’e i tō rātou fare. « ’Ua parau te peropheta ’eiaha roa atu tātou e fa’aea i te fa’aineine. Pēnei a’e e nehenehe tā tātou e ha’aputu i te vahie i teie mahana. E nehenehe tātou e ha’uti mai te hō’ē ha’uti nō te hi’o ē tā vai te mea rahi a’e ! »
’Ua horo atu ra ’o Luka ’e tōna taea’e ’e tōna tuahine i te mau tumu rā’au i pīha’i iho i tō rātou fare. ’Ua ha’apu’e ’o Luka i te rā’au i roto i tōna nā rima ’e ’ua horo atu ra e ’āpapa i roto i te fare vaira’a. I te taera’a tōna taea’e ’e tōna tuahine i reira, ’ua tauturu ato’a ’oia ia rāua nō te ’āpapa atu i tā rāua rā’au. ’Ua horo rātou ’e ho’i mai, horo ’e ho’i mai, ē teitei roa atu ra te rā’au.
« ’Ua nava’i te reira nō te tunu i te mā’a nō te hō’ē hepetoma tā’āto’a ! » Te parau ïa a Mili.
’Ua parau ’o Robert : « E mea ’ārearea roa ». « Mea au nā’u ’ia vai ineine noa ! »
’Ua parau ’o Luka : « ’O vau ato’a ». ’Ua hina’aro ’oia e rave i te tahi atu mea ’ē nō te fa’aineine.
I muri iho, ’ua tanu ’oia ’e tōna taea’e ’e tōna tuahine i te bele (hō’ē pota matie) i roto i tā rātou ’āua. ’Ua tāpū ’o Luka i te ohi i ni’a i te mau tumu tahito ’ia nehenehe ia rātou ’ia tanu i te reira ’e ’ia tupu rahi atu ā.
’A rave ai rātou i te ’ohipa, ’ua haere mai tō rātou nau metua rū’au ’e te metua i rāpae.
« Nā ’outou noa iho i tanu i te bele ? » Te uira’a ïa a pāpā rū’au.
« ’Ē », te pāhonora’a ïa a Luka. « ’E ’ua ’ohi ato’a mai mātou i te vahie ! »
« Māuruuru », te parau ïa a pāpā. « ’Ua rahi roa tā’u ’ohipa i teie mahana. E’ita e noa’a iā’u ’ia rave i te reira. »
I taua avatea ra, ’ua pārahi ’o Luka i roto i te fare ’e tōna ’utuāfare. ’Ua fa’aro’o rātou i te hō’ē fa’aarara’a i ni’a i te ratio e ti’a i te mau ta’ata ato’a ’ia fa’aea i roto i te fare e maha mahana nō te tāpe’a i te pararera’a o te COVID-19. ’Aita e ta’ata i fa’ati’ahia e fa’aru’e i tō rātou fare.
« E mea tano ’ua ha’aputu tātou i te vahie i teie mahana. E’ita tātou e nehenehe ’ia nā reira i teienei », te parau ïa a Mili.
’Ua ’ata ’o Luka. ’Ua ’oa’oa ’oia ’ua pe’e rātou i te anira’a a te peropheta ’ia fa’aineine ia rātou.
Fa’ahōho’ara’a nā Shawna J. C. Tenney