Dali, Sunod Kanako nga mga Kalihokan
Alang sa home evening, pagtuon sa kasulatan, o kalingawan lamang!
Mga Kahoy sa Pagkamatarong
Alang sa Isaias 58–66
Istorya: Si Isaias nagtudlo nga si Jesukristo moabot sa pag-ayo ug paghupay niadtong naguol o nanginahanglan og tabang (tan-awa sa Isaias 61:1). Siya usab miingon nga kadtong motuman sa mga pagtulon-an ni Jesus mahimong sama sa “mga kahoy sa pagkamatarong” (Isaias 61:3).
Awit: “Gibati Ko ang Gugma sa Akong Manluluwas,” (Songbook sa mga Bata, 42–43)
Kalihokan: Pagdrowing og hulagway sa usa ka kahoy. Guntinga ang pipila ka mga dahon. Isulat diha sa mga dahon ang mga paagi nga gitabangan ka ni Jesus dihang imong gisunod ang Iyang mga pagtulon-an. Dayon ipapilit ang mga dahon diha sa kahoy.
Mga Mangingisdag Tawo
Alang sa Jeremias 1–3; 7; 16–18; 20
Istorya: Ang propeta nga si Jeremias nagtudlo nga ang Dios mopadala og “daghang mangingisda” nga motabang sa pagpundok sa Israel (tan-awa sa Jeremias 16:15–16). Kini nga mga tawo mopaambit sa ebanghelyo aron ang tanan makabalik ngadto Kaniya.
Awit: “Unta Tawgon Ko Nila sa Misyon” (Songbook sa mga Bata, 91)
Kalihokan: Pagdula sa dula nga pangisda diha sa pahina 12. Sa unsang paagi makatabang kamo sa pagpundok sa Israel?
Dula sa Pagtag-an sa Kasulatan
Alang sa Jeremias 30–33; 36; Lamentaciones 1; 3
Istorya: Ang Ginoo misulti ni Jeremias sa pagsulat sa Iyang mga pulong (tan-awa sa Jeremias 36:1–4). Mabasa nato kini karon diha sa basahon sa Jeremias. Ang mga kasulatan nagtabang nato nga masayod sa mga pulong sa Langitnong Amahan ug ni Jesukristo.
Awit: “Pagsiksik, Pamalandong ug Pag-ampo” (Songbook sa mga Bata, 66)
Kalihokan: Pagdula og dula sa pagtag-an sa kasulatan! Magpuli-puli sa pag-akting sa inyong paborito nga istorya sa kasulatan. Ipatag-an sa matag usa kon unsa nga istorya ang gi-akting. Unsa ang gitudlo sa inyong paborito nga istorya diha kaninyo?
Mga Sumpay sa Pamilya
Alang sa Ezequiel 1–3; 33–34; 36–37; 47
Istorya: Ang propeta nga si Ezequiel adunay panan-awon sa usa ka suba nga nagdagayday gikan sa templo. Diha sa panan-awon, ang suba mitubo ug mipanalangin sa tanan nga maagian niini (tan-awa sa Ezequiel 47:1–12). Sama sa suba nga mipanalangin sa unsay giagian niini, ang templo nagpanalangin sa atong mga pamilya.
Awit: “Mga Pamilya Mahimong Managuban sa Kahangturan” (Songbook sa mga Bata, 98)
Kalihokan: Ang family history makatabang sa pagdala sa mga panalangin sa templo ngadto sa atong mga pamilya. Adto sa pahina 24 aron makakita kon giunsa sa duha ka batang babaye nga gikan sa Taiwan pagkat-on mahitungod sa ilang pamilya. Dayon buhata ang kalihokan sa pahina 16. Unsaon pa ninyo pagkat-on mahitungod sa inyong pamilya?
Mga paghulagway pinaagi ni Katy Dockrill