Ang Party sa Panaghigalaay
“Sa imong hunahuna malingaw kaha sila?” Nangutana si Maya.
“Wala ako kahibalo unsay buhaton alang sa akong sosyal nga tumong,” miingon si Maya. Milingkod siya sa sopa ug mipakli sa iyang Giya nga Basahon sa Kabataan.
“Ganahan ka ba sa bisan unsang mga ideya sa paghimo og tumong nga anaa sa imong booklet?” Nangutana si Mama.
“Katong bahin sa pag-abi-abi sa uban mora og makalingaw,” miingon si Maya. “Kini nag-ingon sa pagpaila-ila sa imong kaugalingon ngadto sa laing tawo nga bag-o ug tabangan sila sa pag-ila-ila og ubang mga tawo.”
Si Maya mitan-aw sa iyang booklet. “Apan wala akoy nailhan nga akong maabi-abi. Mahimo bang ubanan ko nimo sa pag-ampo, Ma?”
Milingkod si Mama tupad ni Maya. “Minahal nga Langitnong Amahan,” miampo si Maya, “palihog tabangi ko kinsa ang akong abiabihon. Sa ngalan ni Jesukristo, amen.”
Human sa pag-ampo, naghunahuna si Maya sa iyang higala nga si Jayden. Kanunay silang magdula kon maabot si Jayden aron mamisita sa iyang lola. Ug karon si Jayden, iyang papa, ug iyang igsoong lalaki ug igsoong babaye mibalhin uban sa iyang lola.
“Si Jayden diay?” Si Maya nangutana ni Mama. “Dili ko sigurado nga siya ug ang iyang igsoong lalaki ug igsoong babaye nakaila na sa ubang mga bata dinhi. Tingali makatabang ko sa pag-abiabi kanila.”
“Naghunahuna ko sa samang butang,” miingon si Mama. “Unsay gusto nimong buhaton?”
Naghunahuna si Maya sa makadiyot. “Tingali mahimo tang magpahigayon og party sa panaghigalaay!” miingon siya. “Mahimo tang modapit og ubang mga bata gikan sa Primary.”
“Morag maayo kana nga ideya,” miingon si Mama.
Si Maya ug si Mama mipili og adlaw alang sa party. Ilang gitawag ang papa ni Jayden ug gidala ang mga imbitasyon ngadto sa mga bata sa Primary. Dayon panahon na nga magplano sa kalingawan! Si Maya ug si Mama naghunahuna og mga dula. Naghimo sila og daghang pang-miryenda ug mga dekorasyon.
Ang adlaw sa party sa kataposan miabot na. Si Maya naghinamhinam alang kang Jayden ug sa iyang mga igsoon aron sa pagpakigkita sa tanan.
“Sa imong hunahuna malingaw kaha sila?” Nangutana si Maya.
“Sigurado ko nga malingaw gayod sila,” miingon si Mama.
Sa wala madugay miabot na ang tanan. Si Jayden ug ang iyang igsoong lalaki ug igsoong babaye dagko kaayo og mga pahiyom. Nagdula sila, nangaon, ug nakahimo og daghang bag-ong mga higala. Nalipay si Maya sa pagkakita sa tanan nga nalingaw.
“Salamat!” Miingon si Jayden human sa party. ”Makalingaw kaayo kadto.”
Mipahiyom si Maya. Nalipay siya nga nakatabang siya ni Jayden ug sa iyang pamilya nga mibati nga giabiabi ug gihigugma. Ang party sa panaghigalaay malampuson!
Mga paghulagway pinaagi ni Olga Lee