Mga Pioneer sa Matag Yuta
Ang Taas nga Biyahe ni Silvia ngadto sa Templo
Nasayod si Silvia nga ang biyahe bililhon kaayo.
Si Silvia milukso-lukso pasulod sa lawak sa Primary ug milingkod. Siya kanunay nga mibati og kamaayo diha sa Primary.
Si Sister Rioja mipataas og litrato sa templo. “Diha sa templo, kita masilyo ngadto sa atong mga pamilya,” siya miingon. “Kana nagpasabot nga kita makauban nila sa kahangtoran kon kita mosunod sa mga sugo sa Dios.”
Giisa ni Silvia ang iyang kamot. “Moadto ko sa templo aron masilyo ngadto sa akong pamilya sa umaabot nga pipila ka adlaw!” siya miingon. “Naghinam-hinam ko pag-ayo.”
Mipahiyom si Sister Rioja. “Taas kini nga biyahe alang kanimo! Apan nasayod ko nga bililhon kini.”
Walay templo ang Spain, diin nagpuyo ang pamilya ni Silvia. Mao nga kinahanglan silang mobiyahe hangtod sa templo sa Switzerland. Mokabat kini og duha ka adlaw!
Pagka Martes sa buntag, mimata og sayo si Silvia. Gitabangan niya ang iyang mga ginikanan sa pag-andam sa sakyanan. Oras na sa pagbiyahe ngadto sa templo.
Diha sa sakyanan, naningkamot si Silvia nga makasinabot sa iyang magulang nga babaye ug manghod nga lalaki. Nagdula sila ug nanganta og mga kanta. Gipatokar ni Papá ang usa ka pagrekord sa klasikal nga Espanyol nga musika samtang nagdrayb. Dihang gikapoy na siya, si Silvia mitutok sa gawas sa bintana. Nagtan-aw siya sa berde nga mga bungtod nga ilang malabyan hangtod nga nakatulog siya.
Milabay ang unang adlaw. Morag ang pagbiyahe walay kataposan. Apan si Silvia nakahinumdom sa giingon ni Sister Rioja. Bililhon kaayo kini, naghunahuna siya.
Human sa laing adlaw nga pagbiyahe, si Silvia sa kataposan nakakita sa puti nga spire sa templo. “Naa ra!” Gitudlo niya gikan sa bintana. “Toara ang templo!”
Ang manghod nga lalaki ni Silvia mipakpak sa iyang mga kamot. Gitrapohan ni Mamá ang iyang mga luha sa kalipay.
“Nahimo nato kini,” miingon si Papá.
Sa sulod sa templo, si Silvia ug iyang pamilya nag-ilis og puti nga mga sinina. Usa ka buotan nga temple worker milingkod uban ni Silvia ug sa iyang mga igsoon. Dayon iyang gidala sila ngadto sa lawak sa pagsilyo.
Mikidlap ang kahayag gikan sa chandelier. Si Mamá ug Papá miluhod diha sa altar nga giputos og usa ka humok nga piraso sa panapton. Nagpahiyom sila.
Sila si Silvia, iyang igsoong lalaki, ug iyang igsoong babaye miluhod tupad nila ni Mamá ug Papá. Si Silvia mitan-aw ngadto sa dagko nga mga samin diha sa bongbong tupad nila. Ang repleksiyon walay kataposan. Usa ka mainiton nga pagbati mipuno sa iyang kasingkasing. Karon ang iyang pamilya mahimo nga masilyo hangtod sa kahangtoran.
Sa dihang panahon na sa pagpauli, si Silvia ug iyang pamilya misakay og balik sa ilang sakyanan. Sila ang pipila sa unang mga miyembro sa Simbahan gikan sa Spain nga miadto sa templo, ug kana nakapahimo nila nga mga pioneer!
Sa ilang pagbiya, si Silvia mitan-aw na usab gikan sa bintana. Ang templo misidlak batok sa ting-init nga kalangitan. Dili na siya makahulat nga mobalik sa templo pag-usab ugma damlag.
Ang Spain usa ka nasod sa kasadpang Uropa nga Kinatsila ang sinultihan sa mga tawo.
Karon duna nay usa ka templo sa Madrid, ang kapital nga siyudad sa Spain.
Ang Spain nagpatubo og mas daghang olibo kay sa ubang nasod sa kalibotan.
Si Silvia unom ka tuig ang pangidaron dihang ang iyang mga ginikanan nabunyagan.
Mitabang siya sa Primary pinaagi sa pagtimbaya ug pag-abi-abi sa mga bata sa ilang pag-abot.
Karon si Silvia nasilyo ngadto sa iyang bana ug tulo ka mga anak.
Mga paghulagway pinaagi ni Sammie Francis