Nagdapit ni Emma
Si Sam gusto nga mohupay ni Emma. Unsay iyang mahimo?
Si Sam miabli sa mga pultahan sa restawran. Nagdaguok ang iyang tiyan. Gigutom kaayo siya! Kini nga restawran naghimo sa labing lamian nga piniritong manok sukad. Ang iyang pamilya kasagaran moari human sa praktis sa soccer.
Si Sam ug si Mama miadto sa counter aron mo-order. “Hi, Emma!” miingon si Sam. Si Emma ang ilang paboritong tigsilbe. Kanunay siyang mahigalaon ug buotan.
“Kumusta ang praktis sa soccer?” Nangutana si Emma nga may dako nga pahiyom.
“Nindot kaayo. Makadaog na gyod mi ani sa sunod dula!” Miingon si Sam.
“Imo gyod kong sultihan sa tanan mahitungod niini,” miingon si Emma.
Mingisi si Sam, ug ang iyang pamilya mihatag na sa ilang order.
Pagkasunod semana ang team ni Sam nakadaog gyod! Dili na siya makahulat nga sultihan si Emma. Apan si Emma wala didto sa restawran.
Wala gihapon siya pagkasunod semana. Gimingaw na si Sam nga makakita kaniya.
Pipila ka semana ang milabay, ang pamilya ni Sam miadto na usab sa restawran. Si Sam nakakita ni Emma nga nanglimpyo sa mga lamesa. Nagdali siya sa pagsulti og hello.
“Nabalik na ka!” miingon si Sam. “Gimingaw mi nimo.”
“Malipayon kaayo kami nga nakakita kanimo pag-usab,” miingon si Mama.
“Salamat.” Mipahiyom og gamay si Emma. Apan ang iyang mga mata daw masulob-on.
“OK ra ka?” Nangutana si Sam.
“Dili. Ang akong bana namatay. Mao nga wala ko dinhi.”
Gigakos ni Mama si Emma. Nagtan-aw ni Emma nga magul-anon nakapahimo ni Sam nga magul-anon usab.
Sa dihang andam na ang ilang pagkaon, mitabang si Sam sa pagdala sa tray ngadto sa ilang lamesa. Dili siya makahunong sa paghunahuna kon unsa ka magul-anon si Emma. Milingkod siya apan walay gana nga mokaon og bisan unsa. Gusto niyang tabangan siya nga moarang-arang ang gibati. Apan unsay iyang mahimo?
Dayon nakahinumdom si Sam og usa ka butang. Ang ilang bishop nakahatag og gagmayng mga kard ngadto sa tanang pamilya sa simbahan. Ang mga kard nagpakita unsang mga oras ang mga tawo makakita sa kinatibuk-ang komperensiya sa TV o makapaminaw sa radyo. Ang bishop miingon nga ang komperensiya nindot nga panahon aron mobati og kalinaw.
“Ma, makahatag ta ni Emma og kard para sa kinatibuk-ang komperensiya?” Nangutana si Sam. Kon motan-aw si Emma sa komperensiya, basin makatabang na niya nga mobati og arang-arang gamay.
“Nindot kana nga ideya.” Si Mama mikuot sa iyang pitaka ug mikuha og kard. “Dia ra o,” miingon siya. “Mahimo kang mohatag niini kaniya.”
Gikuha ni Sam ang kard gikan ni Mama. Miadto siya sa counter ug nangutana sa tindera kon makasulti ba siya ni Emma.
“Pasayloa ko, apan daghan kaayo siya og gibuhat karon,” miingon ang tawo.
“OK lang,” miingon si Sam. “Mahimo bang ihatag ni nimo niya? Imbitasyon ni aron makatan-aw og espesyal nga komperensiya alang sa akong simbahan.” Gitunol ni Sam ngadto sa tawo ang kard. “Makahimo usab ka nga motan-aw, kon gusto nimo!”
Ang tawo mipahiyom. “Salamat! Segurohon nako nga madawat ni niya.”
Sa dihang mibalik si Sam sa ilang lamesa, mibati siya og kainit sa sulod.
“Kumusta man?” Nangutana si Mama.
“May gibuhat pa si Emma, mao nga gihatag nako ang kard sa laing trabahante aron ihatag ngadto niya,” miingon si Sam. “Karon duha ka tawo ang makakita sa kard! Basin silang duha motan-aw sa komperensiya ug mobati og kalinaw.”
Mga paghulagway pinaagi ni Christine M Schneider